ຜັກຂະເປັນຜັກປ່າພື້ນບ້ານທີ່ນິຍົມກິນໃນ ສປປ ລາວ ແລະ ຫຼາຍປະເທດໃນອາຊີຕາເວັນອອກສຽງໃຕ້ ເນື່ອງຈາກມີຄຸນຄ່າທາງອາຫານ ແລະ ມີລົດຊາດເປັນເອກະລັກ. ເຖິງແມ້ວ່າໃບອ່ອນ ຈະມີກິ່ນທີ່ຄ່ອນຂ້າງແຮງຫຼາຍກໍ່ຕາມ ແຕ່ຄົນສ່ວນຫຼາຍກໍນິຍົມນໍາມາປຸງແຕ່ງອາຫານ.
ວິທີເຮັດຊຸບຜັກຂະ
ສ່ວນປະກອບ
- ຜັກຂະອ່ອນ 300 ກຣາມ
- ໜໍ່ຂ່າອ່ອນ 6-7 ຍອດ
- ໝາກເຜັດສົດ 3-5 ໜ່ວຍ
- ກະທຽມ 3–5 ກີບ
- ປາແດກຕົ້ມ 2 ບ່ວງແກງ
- ເກືອ 1/4 ບ່ວງຊາ
- ຜົງປຸງລົດ 1–2 ບ່ວງຊາ
- ໃບຂີ້ຫູດ 4-5 ໃບ
ວິທີເຮັດ
- ປອກເອົາໜໍ່ອ່ອນຂອງໜໍ່ຂ່າ ນໍາໄປຕົ້ມໃນນໍ້າເດືອດປະມານ 5-10 ນາທີ
- ດັດເອົາແຕ່ຍອດອ່ອນຂອງຜັກຂະ ແລ້ວນໍາໄປລ້າງນໍ້າໃຫ້ສະອາດ ແລ້ວຕົ້ມ ຫຼື ລວກໃນນ້ຳເດືອດ 2–3 ນາທີ.
- ຕັກຂຶ້ນ ແລ້ວປະໃຫ້ເຢັນຈັກໜ້ອຍ.
- ນໍາໝາກເຜັດໄປຈີ່ໃຫ້ສຸກ
- ຕຳໝາກເຜັດ, ກະທຽມ ໃຫ້ລະອຽດ.
- ໃສ່ຜັກຂະ, ໝາກເຜັດ, ກະທຽມທີ່ກຽມໄວ້ນັ້ນລົງໄປ ຄົນໃຫ້ເຂົ້າກັນ.
- ປຸງລົດດ້ວຍປາແດກຕົ້ມ, ເກືອ ແລະ ຜົງປຸງລົດ.
- ນໍາເອົາໃບຂີ້ຫູດໄປລ້າງນໍ້າໃຫ້ສະອາດ ຈາກນັ້ນຊອຍເປັນຕ່ອນນ້ອຍໆໃສ່ລົງໄປແລ້ວຄົນໃຫ້ເຂົ້າກັນ.
- ຊິມລົດຊາດ ແລ້ວພ້ອມເສີບ.
