ກາຣົດແມ່ນພືດທີ່ປູກເພື່ອນຳເອົາສ່ວນຫົວມາບໍລິໂພກ, ເຊິ່ງມີຂະໜາດໃຫຍ່ນ້ອຍແຕກຕ່າງກັນໄປ ແລະ ຍັງມີຫຼາກຫຼາຍສີເຊັ່ນ: ສີເຫຼືອງ, ສີສົ້ມ, ແຕ່ນິຍົມກັນປູກສ່ວນຫຼາຍແມ່ນສີສົ້ມ ທີ່ສຳຄັນກາຣົດຖືກຈັດເປັນອາຫານເພື່ອສຸຂະພາບ.
ສະພາບແວດລ້ອມທີ່ເໝາະສົມ
- ກາຣົດຈະເລີນເຕີບໂຕໄດ້ດີໃນເຂດທີ່ມີອາກາດໜາວ.
- ສຳລັບອຸນຫະພູມທີ່ເໝາະຕໍ່ການຈະເລີນເຕີບໂຕແມ່ນ 18-21 ອົງສາ.
- ເປັນພືດທີ່ຕ້ອງການແສງຫຼາຍໂດຍສະເລ່ຍປະມານ 9-14 ຊົ່ວໂມງ/ວັນ.
- ຈະເລີນເຕີບໂຕໄດ້ດີໃນດິນລວນ, ດິນມີອິນຊີວັດຖຸສູງ ແລະ ລະບາຍນ້ຳໄດ້ດີ.
- ມີຄວາມເປັນກົດດ່າງຂອງດິນ (pH) 6,5-75 ການປູກໃນດິນໜຽວ ຫຼື ໂຄງສ້າງດິນທີ່ແຂງຈະເຮັດໃຫ້ຫົວກາຣົດແຕກ, ມີຮູບຊົງຜິດປົກກະຕິ ຫາກແປງປູກມີຄວາມຊຸ່ມສູງຈະເຮັດໃຫ້ຫົວກາຣົດມີບາດແຜສີດຳ.
ການກະກຽມດິນ
ການກະກຽມດິນແມ່ນຕ້ອງໄດ້ຂຸດດິນຕາກແດດໄວ້ ຫຼັງຈາກນັ້ນຈຶ່ງຫວ່ານປູນຂາວໃສ່ໃນອັດຕາ 80-100 ກຣາມ/ຕາແມັດ ແລ້ວຕາກປະໄວ້ປະມານ 14 ວັນ ພ້ອມທັງກຳຈັດວັດສະພືດອອກໄປ.
ການປູກ ແລະ ບົວລະບັດຮັກສາ
- ກ່ອນປູກຄວນໃສ່ປຸ໋ຍສູດ 12-24-12 ອັດຕາ 20-30 ກຣາມ/ຕາແມັດ ໃນດິນແລ້ວຈຶ່ງປັບໜ້າດິນໃຫ້ພຽງດີ.
- ແບ່ງເປັນຮ່ອງເລິກ 1 ຊມ, ສ່ວນໄລຍະຫ່າງລະຫວ່າງແປງຫ່າງກັນ 15 ຊມ
- ຢອດເມັດລົງໃນໄລຍະຫ່າງ 1 ຊມ, ຫຼັງຈາກນັ້ນຈຶ່ງຖົ່ມເມັດ ແລະ ຫົດນ້ຳໃຫ້ຊຸ່ມ
- ການຖອນແຍກ
ຄັ້ງທີ1: ຫຼັງຢອດເມັດ 15-20 ວັນ (ມີໃບຈິງ 3-5 ໃບ) ຈົ່ງໄລຍະປູກ 3 ຊມ.
ຄັ້ງທີ2: ຫຼັງຢອດເມັດ 30-35 ວັນ (ມີໃບຈິງ 8-9 ໃບ) ຈົ່ງໄລຍະປູກ 5-8 ຊມ.
ຂໍ້ຄວນລະວັງ:
- ລະວັງມົດມາຄາບໄປ ຫຼື ແມງໄມ້ມາກັດກິນເມັດ
- ສຳລັບການຢອດເມັດຢ່າໃຫ້ເມັດຕິດກັນ ໄລຍະຫ່າງປະມານ 1 ຊມ.
- ຄວນໃຫ້ນ້ຳສະຫມໍ່າສະເຫມີແຕ່ຢ່າໃຫ້ຊຸ່ມເກີນໄປ.
ການໃຫ້ນ້ຳ:
ຫຼັງການປູກຄວນຫົດນ້ຳໃຫ້ຊຸ່ມ ແລະ ໃຫ້ນໍ້າທຸກວັນຢ່າງສະໝໍ່າສະເຫມີ ແຕ່ຢ່າໃຫ້ນ້ຳຂັງເພາະຈະເຮັດໃຫ້ຫົວກາຣົດເນົ່າເປື່ອຍ.
ການໃສ່ຝຸ່ນ:
- ຫຼັງຖອນແຍກຄັ້ງທີ 1 ໃສ່ຝຸ່ນສູດ 15-15-15 ອັດຕາ 30-50 ກຣາມ/ຕາແມັດ ພ້ອມກໍາຈັດວັດສະພືດ.
- ຫຼັງການໃສ່ຝຸ່ນຄັ້ງທໍາອິດ 15-20 ວັນ ໃສ່ຝຸ່ນຄັ້ງທີ 2 ໃຊ້ສູດ 13-13-21 ອັດຕາ 30-50 ກຣາມ/ຕາແມັດ. ໂດຍການໂຮຍໃສ່ຮ່ອງທີ່ເລິກ 2-3 ຊມ ລະຫວ່າງແຖວປູກ.
ການເກັບກ່ຽວ:
- ການເກັບກ່ຽວແມ່ນເມື່ອອາຍຸໄດ້ 100-120 ວັນ
- ເກັບກ່່ຽວໂດຍການຂຸດເມື່ອມີອາຍຸ ແລະ ຂະຫນາດເຫມາະສົມ.
- ລ້າງໃຫ້ສະອາດແລ້ວຈຶ່ງນຳມາປະໄວ້ໃຫ້ສະເດັດນໍ້າ ແລະ ລະວັງຢ່າໃຫ້ຜີວກາຣົດເປັນຮອຍລອກ.
ຄຸນຄ່າທາງອາຫານຂອງກາຣົດ
ຫົວກາຣົດອຸດົມໄປດ້ວຍວິຕາມິນ ແລະ ແຮ່ທາດທີ່ມີປະໂຫຍດເຊັ່ນ: ເບຕ້າແຄໂລທີນ, ວິຕາມິນເອ, ວິຕາມິນບີ1, ວິຕາມິນບີ2, ວິຕາມິນຊີ, ວິຕາມິນ ອີ, ທາດແຄຣຊຽມ, ທາດໂພແທດຊຽມ ແລະ ທາດເຫຼັກນອກຈາກນັ້ນຍັງນໍາມາໃຊ້ປະກອບອາຫານໄດ້ຫຼາກຫຼາຍເມນູບໍ່ວ່າຈະເປັນອາຫານຄາວ, ອາຫານຫວານເຊັ່ນ: ເຮັດຂົ້ວ, ທອດ, ແກງ ແລະ ຍຳ ກໍ່ມີກາລົດເປັນສ່ວນປະກອບທັ້ງນັ້ນ ແລະ ຍັງມີເຄື່ອງດື່ມເພື່ອສຸຂະພາບເຊັ່ນ ນໍ້າກາລົດປັ່ນ. ນອກຈາກນີ້ຍັງມີສັບພະຄຸນເປັນຢາຮັກສາພະຍາດໄດ້ຫຼາກຫຼາຍເຊັ່ນກັນ.
ຄຸນປະໂຫຍດຂອງຣົດ:
- ເພີ່ມປະສິດຕິພາບໃຫ້ກັບລະບົບໄຫຼວຽນຂອງເລືອດ
- ຊ່ວຍປ້ອງກັນໂລກມະເຣັງ
- ເສີມສ້າງການຈະເລີນເຕີບໂຕຂອງຮ່າງກາຍ
- ສ້າງພູມຕ້ານທານໃຫ້ແກ່ຮ່າງກາຍ
- ບໍາລຸງສາຍຕາ
- ຮັກສາລະດັບນ້ຳຕານໃນເສັ້ນເລືອດ
- ຊ່ວຍເສີມຄວາມແຂງແຮງຂອງແຂ້ວ
- ປັບປຸງລະບົບຍ່ອຍອາຫານ
- ບໍາລຸງຜິວໃຫ້ໃສ
ຄຸນຄ່າທາງໂພສະນາການຂອງ ກາຣົດ (100 ກຣາມ ) ມີດັ່ງນີ້
- ພະລັງງານ 41 ກິໂລແຄຣລີ
- ຄາໂບໄຮເດດ 9,6 ກຣາມ
- ນ້ຳຕານ 4.7 ກຣາມ.
- ເສັ້ນໄຍ 2.8 ກຣາມ.
- ໄຂມັນ 0.24 ກຣາມ,
- ໂປຣຕີນ 0.39 ກຣາມ.
- ວິຕາມິນບີ 1 0,066 ມິນລິກຣາມ 5%
- ວິຕາມິນບີ 2 0,058 ມິນລິກຣາມ 5%
- ວິຕາມິນຊີ 5,9 ມິນລິກຣາມ 7%
- ທາດເຄຣຊຽມ 33 ມິນລິກຣາມ 3%
- ທາດເຫຼັກ 0.9 ມິນລິກຣາມ 2%
- ທາດຟົສຟໍຣັສ 95 ມິນລິກຣາມ 5%
ທີ່ມາ: ປື້ມຄູ່ມືການປູກພືດຜັກສວນຄົວ
