ປະຫັວດຄວາມເປັນມາ

ປະເທດລາວ ຈຸດລວມສູນທາງດ້ານຊີວະນາໆພັນ. ຊີວະນາໆພັນກະສິກຳ ມີບົດບາດສຳຄັນຢ່າງໃຫ່ຍຫຼວງຕໍ່ການດຳລົງຊີວິດຂອງປະຊາຊົນລາວທັງໃນຊົນນະບົດ ແລະ ຕົວເມືອງ ເຊິ່ງຖືເປັນຊັບພະຍາກອນທາງດ້ານອາຫານທີ່ສຳຄັນສາມາດປະກອບສ່ວນເຂົ້າໃນການຄໍ້າປະກັນສະບຽງອາຫານ, ໂພຊະນາການ ແລະ ສຸຂະພາບ. ​​ຄວາມອຸດົມຮັ່ງມີດັ່ງກ່າວ ຖືໄດ້ວ່າເປັນມໍລະດົກທາງທຳມະຊາດ ແລະ ສັງຄົມທີ່ສຳຄັນ ເນື່ອງຈາກອາຫານລາວ, ພູມປັນຍາ ແລະ ນິທານພື້ນບ້ານ, ລວມເຖິງວັດທະນະທຳລາວສ່ວນໃຫ່ຍແມ່ນມີການເຊື່ອມສານກັບຊີວະນາໆພັນກະສິກຳ.

ໃນຂະນະທີ່ມີການເກັບກຳຂໍ້ມູນທາງດ້ານຊີວະນາໆພັນກະສິກຳເປັນຢ່າງດີ ແຕ່ເນື້ອຫາໃຈຄວາມທີ່ສຳຄັນແມ່ນຍັງກະແຈກກະຈາຍ, ເຂົ້າເຖິງໄດ້ຍາກ ແລະ ມີຄວາມສ່ຽງທີ່ອາດສູນຫາຍໄດ້. ດັ່ງນັ້ນ, ຖານຂໍ້ມູນທີ່ສາມາດຮວບຮວມຄວາມຮູ້ ແລະ ປະສົບການທີ່ພົວພັນສະໜິດແໜ້ນກັບຊີວະນາໆພັນກະສິກຳໃນປະເທດລາວຈຶ່ງມີບົດບາດທີ່ສຳຄັນຫຼາຍ.

ພາເຂົ້າລາວ ຖືກພັດທະນາຂຶ້ນພາຍໃຕ້ໂຄງການພັດທະນາລະບົບນິເວດຊີວະນາໆພັນກະສິກຳຢູ່ເຂດພູດອຍ (TABI), ເຊິ່ງສະໜັບສະໜຸນໂດຍອົງການເພື່ອການພັດທະນາ ແລະ ການຮ່ວມມື ແຫ່ງປະເທດສະຫວິດເຊີແລນ ປະຈຳພາກພື້ນແມ່ນໍ້າຂອງ ໃນໄລຍະປີ 2010-2020. ໂຄງການ TABI ມີເປົ້າໝາຍເພື່ອການອະນຸຮັກ, ເສີມສ້າງ ແລະ ຈັດການກ່ຽວກັບຄວາມຫຼາກຫຼາຍທາງດ້ານຊີວະພາບໃນຂົງເຂດພື້ນທີ່ກະສິກຳພາກເໜືອຂອງລາວ ເພື່ອການປັບປຸງຊີວິດການເປັນຢູ່ຂອງບັນດາຄອບຄົວໃນເຂດເນີນສູງ ແລະ ຍັງໃຫ້ຄວາມສຳຄັນຕໍ່ກັບອົງປະກອບວຽກງານດ້ານການຈັດການຂໍ້ມູນ ແລະ ຄວາມຮູ້ເປັນຢ່າງດີ ເຊິ່ງໄດ້ນຳພາມາສູ່ການສ້າງຖານຂໍ້ມູນພາເຂົ້າລາວໃນທີ່ສຸດ

ພາລະກິດ ແລະ ວິໄສທັດ

ພາເຂົ້າລາວ ມີເປົ້າໝາຍທີ່ຈະເປັນສູນກາງແລກປ່ຽນຂໍ້ມູນຄວາມຮູ້ທາງດ້ານຊີວະນາໆພັນກະສິກຳໃນ ສປປ ລາວ.

ພາລະກິດຂອງພວກເຮົາ: ຮວບຮວມ ແລະ ແບ່ງປັນຂໍ້ມູນຄວາມຮູ້ກ່ຽວກັບຊີວະນາໆພັນກະສິກຳຂອງລາວໃຫ້ກັບບັນດານັກຮຽນນັກສຶກສາ, ນັກຄົ້ນຄ້ວາ ແລະ ຜູ້ຄົນທີ່ສົນໃຈ. ນອກຈາກນີ້ ພວກເຮົາຍັງຫວັງວ່າຈະສາມາດສົ່ງເສີມການຈັດຕັ້ງປະຕິບັດທາງດ້ານການກະສິກຳໃນບັນດາພື້ນທີ່ຕ່າງໆ ຕະຫຼອດເຖິງສົ່ງເສີມການສ້າງມູນຄ່າເພີ່ມ ຊ່ວຍໃຫ້ຊຸມຊົນທ້ອງຖິ່ນສາມາດນຳໃຊ້ຊັບພະຍາກອນທາງທຳມະຊາດໄດ້ຢ່າງຍືນຍົງ.

ວິໄສທັດຂອງພວກເຮົາ: ເວທີໜຶ່ງ ທີ່ທຸກພາກສ່ວນໃນຂົງເຂດວຽກງານດຽວກັນ ຫຼື ກ່ຽວຂ້ອງ ມີສິດທີ່ຈະສາມາດມອບຮັບ ແລະ ນຳໃຊ້ປະໂຫຍດຈາກຊີວະນາໆພັນກະສິກຳຢ່າງຍືນຍົງ ແລະ ຮຸ່ງເຮືອງຫຼາຍຂຶ້ນໃນອະນາຄົດ. ພວກເຮົາຫວັງວ່າ ຈະສາມາດສ້າງແຮງບັນດານໃຈໃຫ້ກັບລູກຫຼານ ແລະ ມີຄວາມເຊື່ອໝັ້ນທີ່ຈະສາມາດສະເຫຼີມສະຫຼອງມໍລະດົກທາງທຳມະຊາດທີ່ອຸດົມສົມບູນຂອງປະເທດລາວ ຄຽງຄູ່ກັບການສົ່ງເສີມວັດທະນະທຳ, ອະນຸຮັກ, ນຳໃຊ້ ແລະ ຈັດການຊັບພະຍາກອນທີ່ມີຄຸນຄ່ານີ້ໄດ້ຢ່າງມີຄວາມຮັບຜິດຊອບ.

ເຄື່ອງມື ແລະ ຜະລິດຕະພັນ

ພາເຂົ້າລາວ ຖານຂໍ້ມູນຊີວະນາໆພັນກະສິກຳທີ່ປະກອບໄປດ້ວຍຊຸດເຄື່ອງມື ແລະ ຊັບພະຍາກອນທີ່ພ້ອມພຽງ ຊ່ວຍໃຫ້ຜູ້ນໍາໃຊ້ສາມາດສຳຫຼວດເວັບໄຊສທີ່ປະກອບໄປດ້ວຍຖານຂໍ້ມູນຂອງຊະນິດພັນພືດ, ເຫັດ ແລະ ສັດຫຼາຍກວ່າ 1,400 ຊະນິດພັນ ຕະຫຼອດເຖິງຂໍ້ມູນທີ່ເຊື່ອມສານກັບບັນດານັກຊີວະນາໆພັນກະສິກຳຕົວແບບໃນປະເທດລາວ. ຖານຂໍ້ມູນ ແມ່ນມີການອັບເດດຢ່າງສະໝໍ່າສະເໝີເປັນປະຈຳທຸກອາທິດ ໃນສື່ສັງຄົມອອນໄລນທາງເຟສບຸກ (Facebook) ແລະ ຍັງມີວີດີໂອຫຼາຍກວ່າ 80 ເລື່ອງເລົ່າໃນ YouTube. ນອກຈາກນີ້, ເວບໄຊສຍັງໄດ້ຮວບຮວມເອົາຂ່າວສານຈາກປະເທດລາວ ແລະ ພາກພື້ນແມ່ນໍ້າຂອງທີ່ກ່ຽວຂ້ອງກັບຊີວະນາໆພັນກະສິກຳ.

ທ່າອ່ຽງ ແລະ ແຜນງານ

ເລີ່ມຈາກຖານຂໍ້ມູນທີ່ປະກອບດ້ວຍຊະນິດພັນຕ່າງໆ ແລະ ຂ່າວສານກ່ຽວກັບຊີວະນາໆພັນກະສິກຳ, ພາເຂົ້າລາວໄດ້ຮັບການພັດທະນາເປັນໂຄງການທີ່ດຳເນີນກິດຈະກຳຫຼາກຫຼາຍຢ່າງ. ພວກເຮົາກຳລັງສຶກສາກ່ຽວກັບບັນຫາທີ່ຕິດພັນກັບຊີວະນາໆພັນກະສິກຳໃນລາວ ແລະ ປະກອບສ່ວນເຂົ້າໃນໂຄງການກະສິກຳເພື່ອໂພຊະນາການ, ຈັດງານທີ່ກ່ຽວຂ້ອງກັບຊີວະນາໆພັນກະສິກຳເປັນຕົ້ນ.

ໃນອະນາຄົດ, ພາເຂົ້າລາວ ຕ້ອງການທີ່ຈະຮັດແໜ້ນບົດບາດ ແລະ ສະຖານະພາບຂອງຕົນ ເພື່ອເປັນສູນກາງການແລກປ່ຽນຂໍ້ມູນຄວາມຮູ້ທາງດ້ານຊີວະນາໆພັນກະສິກຳລາວ. ເພື່ອທີ່ຈະບັນລຸເປົ້າໝາຍດັ່ງກ່າວ, ພວກເຮົາໄດ້ລິເລີ່ມຮ່ວມມືກັບບັນດາຖານຂໍ້ມູນລະດັບໂລກ ເພື່ອແລກປ່ຽນຂໍ້ມູນເຊິ່ງກັນ ແລະ ກັນ. ໃນຂະນະດຽວກັນ ກໍໄດ້ຄົ້ນຄວ້າຫາໂອກາດເພື່ອທີ່ຈະປະກອບສ່ວນຮ່ວມມືກັບພາກເອກະຊົນໃນການສົ່ງເສີມພັດທະນາຊີວະນາໆພັນກະສິກຳ. ທ້າຍທີ່ສຸດ, ພວກເຮົາຫວັງວ່າຈະສາມາດຮັດແໜ້ນອົງປະກອບວຽກງານດ້ານການສຶກສາຄົ້ນຄວ້າໃຫ້ສາມາດມີບົດບາດປະກອບສ່ວນເຂົ້າໃນການຮຽນການສອນຫຼາຍຂຶ້ນ ແລະ ນຳເອົາຄວາມຮູ້ທາງດ້ານຊີວະນາໆພັນກະສິກຳໄປເຜີຍແຜ່ໃຫ້ແກ່ລູກຫຼານໄດ້ຮັບຮູ້.

ເປັນຫຍັງ ຈຶ່ງມີຊື່ວ່າ ພາເຂົ້າລາວ?

ພາເຂົ້າ ຄືຊື່ເອີ້ນໂຕະອາຫານໃນປະເທດລາວ ແລະ ເປັນເອກະລັກສະເພາະຂອງປະຊາຊົນລາວທີ່ເຊື່ອມສານກັບຊີວະນາໆພັນກະສິກຳ. ໂຕະດັ່ງກ່າວນີ້, ດັ້ງເດີມແມ່ນປະດິດຈາກຫວາຍ ຫຼື ໄມ້ໄຜ່ພື້ນເມືອງ. ຄອບຄົວ ແລະ ເພື່ອນມິດສະຫາຍມັກຈະແບ່ງປັນອາຫານ, ຮັບປະທານພ້ອມກັນຢູ່ໂຕະດັ່ງກ່າວເຊິ່ງລ້ວນແລ້ວແຕ່ປະກອບໄປດ້ວຍອາຫານຈາກຊີວະນາໆພັນກະສິກຳບໍ່ວ່າຈະເປັນ ປາ, ເຂົ້າໜຽວ, ຜັກພື້ນບ້ານ, ເອາະ ແລະ ແຈ່ວທີ່ຕຳແບບພື້ນບ້ານ