ວິທີເຮັດນ້ໍາໝັກຊີວະພາບ

ນິຍາມ
   ນ້ໍາໝັກຊີວະພາບແມ່ນນໍ້າທີ່ໄດ້ມາກຈາກຊາກພືດ ແລະ ສັດ ຫຼື ສານອິນຊີຊະນິດຕ່າງໆທີ່ຫາໄດ້ໃນທ້ອງຖິ່ນເຊິ່ງອາດໝັກຮ່ວມກັບກາກນໍ້າຕານ ຫຼື ນ້ໍາຕານຊາຍແດງກໍ່ໄດ້. ຂະບວນການໝັກຂອງນ້ໍາໝັກຊີວະພາບຈະເກີດຈາກການຍ່ອຍສະຫຼາຍຊາກພືດ ແລະ ສັດດ້ວຍຈຸລິນຊີໂດຍໃຊ້ກາກນ້ໍາຕານ ຫຼື ນ້ໍາຕານຊາຍແດງເປັນແຫຼ່ງພະລັງງານ. 

ວິທີເຮັດນ້ໍາໝັກຊີວະພາບ
ນໍ້າຫົວເຊື້ອຈຸລິນຊີ (EM) 
   – ລະລາຍນ້ໍາຕານຊາຍແດງ (Jaggery) ໃນນໍ້າ. 
   – ບີບ ແລະ ປະສົມນໍ້າຕານຊາຍແດງໃຫ້ເຂົ້ານໍ້າດີ. 
   – ຖອກນ້ໍາທີ່ລະລາຍນ້ໍາຕານຊາຍແດງໃສຖັງ. 
   – ໃສ່ນໍ້າຫົວເຊື້ອ EM.
   – ຕື່ມນ້ໍາອີກໃຫ້ໄດ້ 20 ລິດ. 
   – ປິດຝາຖັງໃຫ້ແໜ້ນປະໄວ້ 5-7 ວັນ. 
   – ຍ້າຍເຊື້ອ EM ໃສ່ຖົງຢາງ ແລະ ເກັບໄວ້ໃນບ່ອນທີ່ຮົມ ແລະ ມືດເພື່ອນໍາໃຊ້ໃນຕໍ່ໜ້າ.

ຂະຫຍາຍຫົວເຊື້ອ EM :
   ນໍ້າສະກັດທີ່ໄດ້ມາຈາກຄວາມເຂັ້ມຂຸ້ນກ່ອນຈະນໍາໄປໃຊ້ຕ້ອງຂະຫຍາຍຕົວເຊື້ອສາກ່ອນ.
  ສ່ວນປະສົມ:
  –  ຫົວເຊື້ອ 1 ລິດ 
  –  ກາກນ້ໍາຕານ 1 ລິດ
  –  ນໍ້າ 10 ລິດ 
ວິທີການປະສົມ:
   –  ນໍາທຸກສ່ວນປະສົມເຂົ້າກັນ
   –  ອັດຖັງບໍ່ໃຫ້ອາກາດເຂົາປະໄວ້ປະມານ 3 ວັນສາມາດນໍາໄປໃຊ້ໄດ້. 
ຫມາຍເຫດ: ແຕ່ລະວັນໃຫ້ຄ່ອຍໆເປີດຝາຖັງເພື່ອໃຫ້ອາຍແກັສອອກແລ້ວປິດຝາຖັງໄວ້ຄືເກົ່າເພື່ອປ້ອງກັນບໍ່ໃຫ້ຖັງລະເບີດ). 
   ການເກັບຮັກສາ: 
    –  ເອົານໍ້າຫົວເຊື້ອໃສ່ແກ້ວອັດຝາໃຫ້ແໜ້ນປະໄວ້ໃນບ່ອນອາກາດເຢັນ.
   –  ສັງເກດເບິ່ງຈະເຫັນຜ້າສີຂາວ, ນັ້ນແມ່ນຈຸລີນຊີທີ່ເປັນປະໂຫຍດກໍາລັງຂະຫຍາຍຕົວ.
   –  ກໍລະນີເກັບໄວ້ດົນຄວນເປີດຝາແກ້ວ 1 ເທື່ອຕໍ່ວັນເພື່ອປ່ອຍອາຍແກ໊ສໃນຂວດແກ້ວອອກ. 

ວິທີເຮັດນ້ໍາສະກັດຈາກໃບກະເດົາ
    ນໍ້າສະກັດຈາກໃບກະເດົາ, ຜະລິດເພື່ອກໍາຈັດຈໍາພວກສັດຕູພືດເປັນຕົ້ນແມ່ນບົ້ງກິນໃບ, ດ້ວງ ແລະ ຕັກແຕນທີ່ຈະມາທໍາລາຍຜົນລະປູກ 
 ອຸປະກອນ:
   –  ໃບກະເດົາສົດ 1 ກິໂລ 
   –  ນ້ໍາ 5 ລິດ 
   –  ແຜ່ນຜ້າຝ້າຍ 
ວິທີເຮັດນ້ໍາສະກັດ: 
   ຕໍາໃບກະເດົາສົດໃຫ້ມຸ່ນແລ້ວເອົາມາຫໍ່ໃສ່ແຜ່ນຜ້າຝ້າຍ, ມັດໃຫ້ພໍດີແລ້ວຈຸ່ມລົງນໍ້າປະມານ 15 ນາທີ
ແລ້ວບີບຈະໄດ້ນໍ້າສະກັດໃບກະເດົາສີຂຽວອ່ອນໆ.
ອັດຕາການນໍາໃຊ້: ນໍ້າສະກັດ 1 ລິດລະລາຍໃນນໍ້າ 10 ລິດໃສ່ບັ້ງສີດໄປສິດໃສ່ພືດ. 
ການຜະລິດນ້ໍາສະກັດຊີວະພາບ (Bio-Extracts) 
    ນໍ້າສະກັດຊີວະພາບແມ່ນທາດແຫຼວທີ່ເກີດຈາກການໝັກສ່ວນຕ່າງໆຂອງພືດກັບນໍ້າຕານປະກອບກັບຈຸລິນຊີທີ່ສາມາດເປັນຕົວຍ່ອຍສະຫຼາຍອິນຊີວັດຖຸໃນດິນໃຫ້ກາຍເປັນຝຸ່ນ ແລະ ສານອິນຊີຫຼາຍຊະນິດໃຫ້ກາຍເປັນຝຸ່ນໂດຍກົງທີ່ມີຜົນປະໂຫຍດຕໍ່ການປູກຝັງ, ລ້ຽງສັດ ແລະ ຮັກສາສິ່ງແວດລ້ອມໄດ້ເປັນຢ່າງດີ.
ຈຸດດີຂອງນ້ໍາສະກັດຊີວະພາບ (Bio Extracts).
   –  ໃຊ້ເລັ່ງການຈະເລີນເຕີບໂຕ. 
   –  ຫຼຸດຜ່ອນການລະບາດຂອງແມງໄມ້ສັດຕູພືດ. 
   –  ໃຊ້ເຮັດປຸ໋ຍບົ່ມ. 
   –  ໃຊ້ປຸ໋ຍບົ່ມແຫ້ງ, ຝຸ່ນໝັກ, ບໍາລຸງດິນ.. 
   –  ຕົ້ນທຶນຕໍ່າສາມາດຜະລິດເອົາເອງໄດ້.
   –  ໃຊ້ດັບກິ່ນຫ້ອງນ້ໍາ, ຄອກສັດ, ບໍລິເວນນໍ້າເສຍ.
   –  ໃຊ້ປະສົມກັບນ້ໍາ ຫຼື ອາຫານໃຫ້ສັດກິນເຮັດໃຫ້ສັດແຂງແຮງຕ້ານທານຕໍ່ພະຍາດ. 
   –  ຊ່ວຍຄວບຄຸມຄຸນນະພາບນໍ້າໃນໜອງ.
   –  ຊ່ວຍກໍາຈັດວົງຈອນຂອງແມງວັນ ແລະ ຍຸງໄດ້. 

ວິທີເຮັດນ້ໍາສະກັດຊີວະພາບ:
  ສ່ວນປະກອບມີຄື:
    –   ບອນ 0,5 ກລ.
    –   ຜັກບົ່ງ 0,5 ກລ.
    –   ກະລໍາປີ 0,5 ກລ. 
    –   ໝາກໂມ 0,5 ກລ. 
    –   ໝາກນັດ 0,5 ກລ. 
    –   ໝາກຫຸ່ງ 0,5 ກລ.
    –   ກາກນ້ໍາຕານ 1 ລິດ (ຖ້າບໍ່ມີກາກນ້ໍາຕານສາມາດນໍາໃຊ້ນ້ໍາຕານແດງ 1 ກລ). 
ໝາຍເຫດ: ຖ້າບໍ່ມີຄົບສາມາດໃຊ້ເສດພືດໜຶ່ງ ຫຼື ສອງຊະນິດແທນກໍໄດ້.

ວິທີການສະກັດຄື:
    –  ເອົາຜັກ ແລະ ໝາກໄມ້ມາຟັກໃຫ້ເປັນຕ່ອນນ້ອຍໆ.
    –  ຫຼັງຈາກນັ້ນໃຫ້ເອົາລົງຖັງພລາສະຕິກພ້ອມທັງໃສ່ກາກນໍ້າຕານ, ຄົນໃຫ້ເຂົ້າກັນແລ້ວອັດຝາບໍ່ໃຫ້ອາກາດເຂົ້າ.
    –  ໝັກໄວ້ 5-7 ວັນແລ້ວຕອງເອົານໍ້າກະກັດມາເກັບໄວ້. 

ຂໍ້ມູນຈາກ: ປື້ມເນື້ອໃນຄູ່ມືເຝິກອົບຮົມການຜະລິດກະສິກໍາຂອງສະຖານການສຶກສາ