5 ຜັກທີ່ບໍ່ຄວນກິນດິບ

Last updated on November 8, 2024
(first published: November 8, 2024)
by Sakhone INTHAVONG

ພວກເຮົາມາເບິ່ງກັນເລີຍວ່າມີຜັກຫຍັງແດ່ທີ່ບໍ່ຄວນກິນດິບ

ພືດຜັກແຕ່ລະຊະນິດລ້ວນແຕ່ມີປະໂຫຍດຕໍ່ຮ່າງກາຍທີ່ແຕກຕ່າງກັນ ບາງຊະນິດທີ່ນິຍົມຮັບປະທານແບບສົດເພື່ອໃຫ້ໄດ້ລົດຊາດທີ່ແຊບ ແລະ ມີປະໂຫຍດ, ແຕ່ກົງກັນຂ້າມກໍມີຜັກຫຼາຍຊະນິດທີ່ບໍ່ຄວນກິນດິບເພາະມັນຈະສົ່ງຜົນກະທົບຕໍ່ຮ່າງກາຍ ສະນັ້ນພວກເຮົາມາເບິ່ງກັນເລີຍວ່າມີຜັກຫຍັງແດ່?

ກະລ່ຳປີ: ຫ້າມກິນດິບສຳລັບຜູ້ເປັນພະຍາດທີ່ມີພາວະໄຮໂປໄທຣອຍ Hypothyroidism ເຊິ່ງເປັນພາວະທີ່ຕ່ອມໄທຣອຍເຮັດວຽກຊ້າ, ເພາະໃນຜັກກະລ່ຳປີມີ ສານກອຍໂຕເຈນ Goitrogen ເຊິ່ງມັນນອນໃນກຸ່ມທີ່ຂັດຂວາງຕໍ່ການສ້າງຮໍໂມນ ໃນຕ່ອມໄທຣອຍ ຈຶ່ງເຮັດໃຫ້ຮ່າງກາຍນຳເອົາໄອໂອດິນໄປສ້າງຮໍໂມນໄຊຣອກຊິນນ້ອຍກວ່າປົກກະຕິ ຫຼື ເຮັດໃຫ້ຕ່ອມໄທຣອຍເຮັດວຽກຊ້າລົງອີກ, ແຕ່ຫາກກິນຜັກກະລ່ຳໂດຍຜ່ານຄວາມຮ້ອນສານກອຍໂຕເຈນກໍໝົດໄປ, ສຳລັບຄົນທົ່ວໄປກໍສາມາດຮັບປະທານແບບດິບໄດ້ ເພາະໃນຜັກກະລ່ຳກໍມີຄຸນປະໂຫຍດຫຼາຍເຊັ່ນກັນ ໃນນີ້ຍັງມີສານ ໄອໂຊໄທໂອ ໄຊຍາເນດ (Isothiocyanate) ເປັນສານທີ່ສາມາດກະຕຸ້ນເອນໄຊດ໌ທີ່ທຳລາຍສານພິດໄດ້, ທີ່ສຳຄັນຍັງສາມາດຊ່ວຍຕໍ່ຕ້ານອະນຸມູນອິດສະຫຼະ ແລະ ເສີມສ້າງພູມຄູ້ມກັນແກ່ຮ່າງກາຍອີກດ້ວຍ.
ຖົ່ວງອກ: ໃນຖົ່ວງອກຈະມີເຊື້ອຈູລິນຊີ ຫຼື ສານຟອກຂາວປົນເປື້ອນ ເນື່ອງຈາກເວລາປູກໃຫ້ງອກຈະຕ້ອງໄດ້ອາໄສຄວາມຊຸ່ມ ເຊິ່ງມັນເໝາະແກ່ການຈະເລີນເຕີບໂຕຂອງຈຸລິນຊີ ເຊັ່ນ: ຈຳເຊື້ອຊັນໂມເນວລາ ແລະ ເຊື້ອອີໂຄໄລ ສະນັ້ນຫາກເຮົາກິນດິບ ຫຼື ລ້າງບໍ່ສະອາດ ຮ່າງກາຍກໍຈະໄດ້ຮັບເຊື້ອເຫຼົ່ານັ້ນ ແລະ ທີ່ສຳຄັນຜູ້ທີ່ມີພູມຄຸ້ມກັນຕ່ຳເປັນຕົ້ນແມ່ນເດັກນ້ອຍ ຫຼື ແມ່ຍິງຖືພາແມ່ນມີຄວາມສ່ຽງສູງທີ່ຈະໄດ້ຮັບອັນຕະລາຍຈາກເຊື້ອດັ່ງກ່າວ. ອີກທາງເລືອກໜຶ່ງຫາກຈະກິນດິບແມ່ນໃຫ້ນຳມາແຊ່ນ້ຳດ່າງທັບທິມກ່ອນເພື່ອຂ້າເຊື້ອຈຸລິນຊີເຫຼົ່ານັ້ນ.
ຖົ່ວຝັກຍາວ: ການກິນຖົ່ວຝັກຍາວຕ້ອງໄດ້ລະວັງສານຈາກຢາປາບສັດຕູພືດ ແລະ ປູ໋ຍເຄມີ, ປົກກະຕິແລ້ວຫາກມີການສີດພົ່ນສານດັ່ງກ່າວ ສາມາດນຳມາຮັບປະທານໄດ້ຫຼັງຈາກ 7 ວັນ ເພື່ອໃຫ້ສານລະລາຍໄປເອງຕາມທຳມະຊາດ. ການສີດສານເຄມີຖົ່ວຝັກຍາວຈະດູດຊືມເອົາສານໂມໂນໂຄໂຕຟອສ Monocrotophos ຫາກລ້າງພຽງພາຍນອກຈະບໍ່ສາມາດລ້າງສານດັ່ງກ່າວໄດ້, ສະນັ້ນກ່ອນຈະຮັບປະທານຄວນຫັກເປັນທ່ອນເພື່ອແຊ່ນ້ຳໄວ້ປະມານ 5 ນາທີ.
ໜໍ່ໄມ້ ແລະ ມັນຕົ້ນ: ເພາະຈະມີການປົນເປື້ອນຂອງສານໄຊຍາໄນທີ່ມີຕາມທຳມະຊາດ ຫາກກິນດິບຮ່າງກາຍຈະບໍ່ສາມາດ ຂັບສານພິດຈຳພວກນີ້ມາໄດ້ພຽງເລັກນ້ອຍ ດັ່ງນັ້ນກ່ອນຈະນຳມາຮັບປະທານທຸກຄັ້ງຕ້ອງໄດ້ຕົ້ມໃຫ້ສຸກກ່ອນ, ຫາກເຮົາກິນດິບສານດັ່ງກ່າວຈະເຂົ້າໄປຈັັບເມັດເລືອດສົ່ງຜົນໃຫ້ຮ່າງກາຍຂາດອອັກຊີເຈນ, ວິນຫົວ ແລະ ອາດເປັນອັນຕະລາຍເຖິງຊີວິດໄດ້, ດັ່ງນັ້ນກ່ອນຈະຮັບປະທານທຸກຄັ້ງຕ້ອງນຳມາຕົ້ມໃຫ້ສຸກກ່ອນ.
ຜັກຫົມ: ການກິນຜັກຫົມກໍບໍ່ມີອັນຕະລາຍຮ້າຍແຮງຕໍ່ຮ່າງກາຍ ພຽງແຕ່ມີສານ ຕ້ານໂພຊະນາການ ເຊັ່ນ: ສານອົກຊາລິກ Oxalic Acid ທີ່ຈະຕ້ານການດູດຊຶມທາດເຫຼັກ ແລະ ແຄລຊ້ຽມ, ດັ່ງນັ້ນບຸກຄົນທີ່ມີອາການຂາດທາດດັ່ງກ່າວຈະມີຄວາມສ່ຽງສູງ.