9 ໝາກໄມ້ພື້ນບ້ານໃຫ້ວິຕາມິນຊີ ກິນແລ້ວສຸຂະພາບດີ

ດັ່ງທີ່ຫຼາຍໆຄົນຮູ້ ວິຕາມິນ ຊີ ເປັນວິຕາມິນທີ່ຈຳເປັນ ແລະ ມີບົດບາດສຳຄັນຕໍ່ສຸຂະພາບຮ່າງກາຍຂອງມະນຸດ ຊ່ວຍເສີມສ້າງພູມຕ້ານທານ ມີສານຕໍ່ຕ້ານອານຸມູນອິດສະຫຼະ ແຕ່ວ່າຮ່າງກາຍຂອງມະນຸດເຮົາບໍ່ສາມາດຜະລິດເອງໄດ້.

ວິຕາມິນຊີ ເປັນວິຕາມິນຊະນິດລະລາຍໃນນໍ້າ ສາມາດພົບໄດ້ໃນພືດຜັກ ແລະ ໝາກໄມ້ຫຼາຍຊະນິດ ເຊັ່ນ: ໝາກເຂົ້າ, ໝາກໝັ້ນ, ໝາກຫຼອດເປັນຕົ້ນ ເຊິ່ງໝາກໄມ້ເຫຼົ່ານີ້ເປັນໝາກໄມ້ພື້ນບ້ານຂອງປະເທດລາວເຮົາ ສາມາດຫາຮັບປະທານໄດ້ງ່າຍ ລາຄາກໍ່ບໍ່ແພງສາມາດຈັບຕ້ອງໄດ້.

ວິຕາມິນຊີ ເປັນທີ່ຮູ້ຈັກຂອງຫຼາຍໆຄົນໂດຍສະເພາະຜູ້ຍິງ ເພາະນອກຈາກທີ່ຊ່ວຍເພີ່ມພູມຕ້ານທານແລ້ວ ຍັງຊ່ວຍບຳລຸງຜິວພັນໃຫ້ສວຍງາມດັ່ງທີ່ສາວໆຫຼາຍຄົນຕ້ອງການ ແຕ່ການຮັບປະທານນັ້ນຄວນສຶກສາວິທີການໃຫ້ຖືກວິທີ ແລະ ເໝາະກັບຮ່າງກາຍຂອງແຕ່ລະຄົນ ບໍ່ຄວນບໍລິໂພກໃນຈຳນວນຫຼາຍ ຫຼື ໜ້ອຍເກີນໄປ, ປະລິມານວິຕາມິນຊີທີ່ແນະນຳສຳລັບຜູ້ຍິງຕໍ່ມື້ຄື 75 mg.

ໝາກກະທັນ

ໝາກກະທັນ ນິຍົມນຳໃຊ້ເພື່ອປະກອບອາຫານ, ເປັນສິນຄ້າ ແລະ ໃຊ້ເປັນຢາ ເນື່ອງຈາກອຸດົມໄປດ້ວຍວິຕາມິນຕ່າງໆ ເຊັ່ນ:ວິຕາມິນ ຊີ, ເຊິ່ງຕົ້ນກະທັນເປັນໄມ້ຢືນຕົ້ນ ໝາກສາມາດກິນໄດ້ ມີລົດຊາດຫວານ ແລະ ມີຄຸນຄ່າທາງອາຫານ ຊ່ວຍບໍາລຸງຜິວພັນ, ຊ່ວຍໃຫ້ນອນຫລັບ, ບໍາລຸງຮ່າງກາຍຊ່ວຍຈະເລີນອາຫານ, ບໍາລຸງກ້າມເນື້ອ ແລະ ເລືອດ, ຮັກສາພະຍາດເລືອດຈາງ, ບໍາລຸງປະສາດ ແລະ ສະໝອງ, ຊ່ວຍປ້ອງກັນພະຍາດຄວາມດັນເລືອດສູງ, ບໍາລຸງຕັບ, ບໍາລຸງມ້າມ,ປ້ອງກັນພະຍາດຫົວໃຈ, ບໍາລຸງກະດູກ, ບໍາລຸງແຂ້ວ, ແກ້ຖອກທ້ອງ, ແກ້ໄຂ້.

ໝາກຂາມ

ໝາກຂາມກໍເປັນໜຶ່ງໃນໝາກໄມ້ທີ່ປະກອບໄປດ້ວຍວິຕາມິນ ຊີ ແລະ ແຮ່ທາດທີ່ມີປະໂຫຍດຫຼາຍຊະນິດ ທັງວິຕາມິນ ເອ ແລະ ຊີ, ປົກກະຕິແລ້ວ ຜູ້ຄົນນຳໃຊ້ປະກອບອາຫານ ແລະ ໃຊ້ເປັນຢາ ຊ່ວຍບັນເທົາອາການເຈັບແຂ້ວ.

ໝາກໝັ້ນ

ຕົ້ນໝາກໝັ້ນ ເປັນໄມ້ຢືນຕົ້ນ ມີວິຕາມິນຊີ ແລະ ແຄວຊຽມ, ໝາກໝັ້ນ ຊ່ວຍໃນເລື່ອງການປັບປຸງຊ່ອມແຊມຮ່າງກາຍ ໃຫ້ອ່ອນໄວ, ປ້ອງກັນພະຍາດຕິດຕໍ່ຊໍ່າເຮື້ອ ເພາະໝາກໝັ້ນເປັນໝາກໄມ້ທີ່ມີໄຂມັນຕໍ່າ ແລະ ສານອາຫານຫຼາຍຊະນິດທີ່ສໍາຄັນເຊັ່ນ: ວິຕາມິນ, ເກືອແຮ່, ຄາໂບໄຮເດດ ແລະ ອື່ນໆ ຊ່ວຍເສີມສ້າງພູມຄຸ້ມກັນໃຫ້ກັບຮ່າງກາຍ ແລະ ຊ່ວຍປ້ອງກັນ ຕໍ່ຕ້ານພະຍາດມະເຮັງ.

ຂໍ້ຄວນລະວັງ: 

• ສໍາລັບຄົນທົ່ວໄປໝາກໝັ້ນເປັນຢາລະບາຍ, ການຮັບປະທານຄັ້ງລະຫຼາຍໆອາດຈະເຮັດໃຫ້ຖອກທ້ອງໄດ້, ຄວນຮັບປະທານໃນປະລິມານທີ່ເໝາະສົມ.
• ສໍາລັບຜູ້ຍິງທີ່ຖືພາບໍ່ຄວນຮັບປະທານໝາກໝັ້ນໃນປະລິມານທີ່ຫຼາຍຈົນເກີນໄປ.
• ຜູ້ທີ່ປ່ວຍເປັນພະຍາດໝາກໄຂ່ຫລັງ, ຜູ້ທີ່ຕ້ອງລ້າງໝາກໄຂ່ຫລັງຢູ່ເປັນປະຈໍາ, ລວມໄປເຖິງຜູ້ທີ່ມີອາການຖ່າຍແຫຼວ ຫຼື ມີອາການຂອງລໍາໄສ້ບໍ່ປົກກະຕິບໍ່ຄວນຮັບປະທານ.

ໝາກຫຼອດ

ໝາກສຸກມີລົດຊາດສົ້ມຫວານ ແລະ ກິນເປັນໝາກສົ້ມກັບແຈ່ວກໍແຊບ ແລະ ຍັງອຸດົມສົມບູນໄປດ້ວຍວິຕາມິນຊີ ຊ່ວຍໃນການຕໍ່ຕ້ານອານຸມູນອິດສະຫຼະໄດ້, ບຳລຸງຫົວໃຈ, ຊ່ວຍບໍາລຸງຜິວໜັງໃຫ້ສົມບູນ,ຮັກສາດວງຕາ, ຊ່ວຍແກ້ອາການປວດຮາກ ວິນຫົວເຈັບຫົວໄດ້.

ໝາກກ້ຽງນ້ຳບາກ

ໝາກກ້ຽງນ້ຳບາກ ຂຶ້ນຊື່ເລື່ອງຄວາມຫວານແຊບ ແຕ່ຮູ້ບໍ່ວ່່າ ນອກຈາກຈະກິນແຊບແລ້ວ ຍັງໃຫ້ຊັບພະຄຸນທາງການຢາ ແລະ ໂພຊະນາການຫຼາກຫຼາຍໂດຍສະເພາະວິຕາມິນຊີ ຊ່ວຍບຳລຸງຜິວ ຕ້ານອານຸມູນອິດສະຫຼະ ຊ່ວຍປົກປ້ອງຈຸລັງຜິວຈາກການຖຶກແສງແດດທຳລາຍ, ປົກປ້ອງຜິວຈາກມົນລະຜິດ, ບໍາລຸງຈຸລັງຜິວໃຫ້ແຂງແຮງ ເຮັດໃຫ້ຜິວຊຸ່ມຊື່ນຕະຫຼອດເວລາ ເນື່ອງຈາກວິຕາມິນຊີເປັນທາດຕັ້ງຕົ້ນຂອງຄໍລາເຈນນັ້ນເອງ.

ໝາກຄາຍ

ຕົ້ນໝາກຄາຍ ໝາກໄມ້ເມືອງໜາວ ຊ່ວຍບຳລຸງ ແລະ ຮັກສາສາຍຕາ ເສີມສ້າງ, ບໍາລຸງກະດູກ ແລະ ແຂ້ວໃຫ້ແຂງແຮງ, ແກ່ນຊ່ວຍບັນເທົາອາການເຈັບຫົວ.

ໝາກພຸກ ຫລື ໝາກກ້ຽງໃຫ່ຍ

ໝາກພຸກ ນິຍົມນຳມາປະກອບອາຫານ ລົດຊາດສົ້ມຫວານ ມີຊັບພະຄຸນທາງການໃຊ້ຮັກສາພະຍາດຕ່າງໆໄດ້ດີ ຮັບປະທານໝາກພຸກຊ່ວຍຂັບສານຜິດໃນຮ່າງກາຍໄດ້, ມີສ່ວນຊ່ວຍຫຼຸດຄວາມສ່ຽງຂອງການເກີດພະຍາດມະເຮັງ.

ໝາກຈອງ

ໝາກຈອງເປັນໝາກໄມ້ທີ່ມີລົດຫວານ, ມີນໍ້າຕານທີ່ຮ່າງກາຍສາມາດນໍາໄປໃຊ້ເປັນພະລັງງານໄດ້ທັນທີເຮັດໃຫ້ບໍ່ຮູ້ສຶກຢາກຮັບປະທານອາຫານ, ໝາກຈອງຈືຶ່ງເປັນອີກໜຶ່ງໝາກໄມ້ທີ່ເໝາະສໍາລັບຜູ້ທີ່ຕ້ອງການຫຼຸດນໍ້າໜັກ. ມີປະໂຫຍດຫຼາຍສໍາລັບຜູ້ປ່ວຍທີ່ເປັນພະຍາດກ່ຽວກັບລໍາຄໍ, ຮ່າງກາຍອ່ອນແອ, ເປັນພະຍາດເລືອດຈາງ ເສີມສ້າງພູມຄຸ້ມກັນຊ່ວຍໃຫ້ຮ່າງກາຍແຂງແຮງຂຶ້ນ. ຊ່ວຍບັນເທົາອາການເຈັບປ່ວຍຕ່າງໆໃນຮ່າງກາຍ, ຊ່ວຍຟອກເລືອດໃຫ້ສະອາດ ເຮັດໃຫ້ໝາກໄຂ່ຫລັງເຮັດວຽກໄດ້ດີຂຶ້ນ, ຊ່ວຍປັບສົມດູນຂອງນໍ້າຕານໃນເລືອດ ແລະ ຊ່ວຍຂັບປັດສະວະ

ໝາກເຂົ້າ

ຄຸນປະໂຫຍດທາງໂພສະນາການ ແລະ ຢາປົວພະຍາດຂອງໝາກເຂົ້າ:

• ໝາກເຂົ້າມີວິຕາມິນຊີສູງ 40 ເທົ່າ ຂອງໝາກກ້ຽງ.
• ມີເບຕາແຄໂລທີນ 10 ເທົ່າຂອງໝາກກາລົດ.
• ມີສານໄລໂຄປີນ 12 ເທົ່າຂອງໝາກເລັ່ນ.
• ບຳລຸງສາຍຕາ.
• ປ້ອງກັນໂລກມືນຊາ.
• ບຳລຸງເຊວຂອງຜິວໜັງ ຕ້ານອະນຸມູນອິດສະຫຼະ ຊະລໍຄວາມແກ່.
• ຫຼຸດຄວາມສ່ຽງ ຂອງການເກີດໂລກຫຼອດເລືອດຫົວໃຈ.
• ຊ່ວຍຕ້ານມະເຮັງ ເຊັ່ນ: ມະເຮັງຕ່ອມລູກໝາກ, ມະເຮັງປອດ, ມະເຮັງຕັບ, ມະເຮັງກະເພາະອາຫານ.