December 5, 2024
ການຈັດຕັ້ງປະຕິບັດວຽກງານຄຸ້ມຄອງສັດນ້ຳ-ສັດປ່າ ຢູ່ ສປປ ລາວ ເຫັນວ່າໃນຫຼາຍທ້ອງຖິ່ນໄດ້ເອົາໃຈໃສ່ຢ່າງຕັ້ງໜ້າ ໂດຍສະເພາະແມ່ນການກວດກາລາດຕະເວນຢູ່ຂອບເຂດພື້ນທີ່ປ່າສະຫງວນ ແລະ ປ່າປ້ອງກັນແຫ່ງຊາດ, ເຂດທີ່ຫຼໍ່ແຫຼມ ແລະ ອື່ນໆ ພ້ອມດຽວກັນນັ້ນ ກໍ່ໄດ້ອອກລະບຽບ ແລະ ມາດຕະການໃນການຫ້າມລ່າ, ຫ້າມຈັບສັດ ໃນໄລຍະທີ່ສັດນ້ຳ-ສັດປ່າ ຖືພາ ແລະ ອອກແມ່ແຜ່ລູກ ພ້ອມທັງສະກັດກັ້ນການຄ້າຂາຍສັດປ່າທີ່ຜິດກົດໝາຍ.
ໃນປັດຈຸບັນການຈັດຕັ້ງປະຕິບັດວຽກງານຄຸ້ມຄອງສັດນ້ຳ-ສັດປ່າ ຢູ່ ສປປ ລາວ ໂດຍອີງໃສ່ກົດໝາຍ ວ່າດ້ວຍສັດນ້ຳ ແລະ ສັດປ່າ, ບັນດານິຕິກຳຕ່າງໆທີ່ກ່ຽວຂ້ອງ ເພື່ອໂຄສະນາເຜີຍແຜ່ໃຫ້ປະຊາຊົນບັນດາເຜົ່າ, ອົງການຈັດຕັ້ງຕ່າງໆ ຕະຫຼອດເຖິງບັນດາຫົວໜ່ວຍທຸລະກິດ ໄດ້ຮັບຮູ້ ແລະ ເຂົ້າໃຈກ່ຽວກັບຄວາມໝາຍ ແລະ ຄວາມສຳຄັນໃນການອະນຸລັກສັດນ້ຳ-ສັດປ່າ ໃຫ້ກາຍເປັນທ່າແຮງໜຶ່ງທີ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ ໂດຍລັດໄດ້ສົ່ງເສີມບຸກຄົນ ແລະ ການຈັດຕັ້ງຂະຫຍາຍພັນສັດນ້ຳ-ສັດປ່າ ຕາມທຳມະຊາດ, ໂດຍນຳໃຊ້ເຕັກນິກວິຊາການ ເພື່ອເພີ່ມຈຳນວນສັດນ້ຳ-ສັດປ່າ ໃຫ້ຫຼາຍຂຶ້ນ ນອກນັ້ນ,ຍັງໄດ້ຟື້ນຟູບູລະນະຖິ່ນທີ່ຢູ່ອາໄສ ທີ່ເຊື່ອມໂຍງ ລວມທັງແຫຼ່ງອາຫານ ແລະ ແຫຼ່ງແພ່ພັນ ເພື່ອໃຫ້ສັດປ່າດຳລົງຊີວິດຢ່າງປົກກະຕິ. ພ້ອມດຽວກັນນັ້ນ ກໍ່ໄດ້ປຸກລະດົມທົ່ວປວງຊົນໃຫ້ມີສ່ວນຮ່ວມໃນການພັດທະນາສັດນ້ຳ-ສັດປ່າ ຢ່າງກວ້າງຂວາງ, ສືບຕໍ່ເຜີຍແຜ່ໂຄສະນາຢ່າງຕໍ່ເນື່ອງລຽນຕິດ ເພື່ອໃຫ້ບຸກຄົນ, ຄອບຄົວ ແລະ ການຈັດຕັ້ງຕ່າງໆຮູ້ເຖິງຂໍ້ຫ້າມ ໃນການຄຸ້ມຄອງສັດນ້ຳ-ສັດປ່າ ທີ່ຍັງມີຊີວິດ ແລະ ການລັກລອບຊື້-ຂາຍ, ການລ່າສັດຫວງຫ້າມ, ການລ່າສັດໃນລະດູການຂະຫຍາຍພັນ, ການລ່າສັດນ້ຳ-ສັດປ່າແບບດັບສູນ ແລະ ອື່ນໆ.
ສັດນ້ຳ-ສັດປ່າ ປະເພດຫວງຫ້າມ ຢູ່ ສປປ ລາວ ມີຫຼາຍຊະນິດເຊັ່ນ: ສັດລ້ຽງລູກດ້ວຍນ້ຳນົມ ມີ 44 ຊະນິດ, ສັດເລືອຄານ 8 ຊະນິດ, ສັດປີກ 36 ຊະນິດ, ສັດນ້ຳ 7 ຊະນິດ, ສັດເຄິ່ງບົກເຄິ່ງນ້ຳ 1 ຊະນິດ(ປາຕີນ), ສ່ວນສັດນ້ຳ-ສັດປ່າ ປະເພດຄຸ້ມຄອງ ມີ: ສັດລ້ຽງລູກດ້ວຍນ້ຳນົມ ມີ 15 ຊະນິດ, ສັດເລືອຄານ 13 ຊະນິດ, ສັດປີກ 21 ຊະນິດ, ສັດນ້ຳ 9 ຊະນິດ ແລະ ແມງໄມ້ 7 ຊະນິດ ໃນນີ້ສັດທີ່ສູນພັນແລ້ວປະກອບມີ: ແຮດນໍດຽວ, ແຮດສອງນໍ, ງົວບາ ແລະ ຄວາຍປ່າ.
ທີ່ມາ: ປະເທດລາວ Pathedlao
