ຄຸນປະໂຫຍດຈາກ ຫຍ້າ ທີ່ບໍ່ຄວນເບິ່ງຂ້າມ

ຫຍ້າພືດລົ້ມລຸກ ມີຄຸນປະໂຫຍດທີ່ບໍ່ຄວນເບິ່ງຂ້າມ ບາງຊະນິດກໍເປັນພືດລົ້ມລຸກ ອາຍຸປີດຽວ ບາງຊະນິດກໍເປັນພືດລົ້ມລຸກອາຍຸຫຼາຍປີ

ແລ້ວຈຸດພິເສດຂອງຫຍ້າແມ່ນຫຍັງ ເປັນຫຍັງເຮົາຈຶ່ງບໍ່ຄວນເບິ່ງຂ້າມ?

ຫຍ້າ ເປັນພືດລົ້ມລຸກ ສາມາດພົບໄດ້ທົ່ວໄປ ໂດຍສະເພາະຕາມແຄມທາງ ແລະ ທົ່ງໄຮ່ທົ່ງຫຍ້າທົ່ວໄປ ບາງຄົນອາດຈະຮູ້ສຶກລຳຄານ ວ່າຫຍ້າເຮັດໃຫ້ທີ່ດິນຮົກເຮື້ອ ແລະ ທຳລາຍຖິ້ມ ແຕ່ຮູ້ບໍວ່າຄວາມຈິງແລ້ວເຮົາສາມາດໃຊ້ປະໂຫຍດຈາກຫຍ້າເຫຼົ່າໄດ້ເປັນຢ່າງດິ ຖ້າເຮົາສາມາດສຶກສາເຖິງວິທີການປູກທີ່ຖືກຕ້ອງ ໂດຍການກຳນົດປະລິມານ ເປັັນຕົ້ນ ເພາະວ່າຫຍ້າແຕ່ລະຊະນິດນັ້ນມີຄຸນປະໂຫຍດ ດັ່ງຕໍ່ໄປນີ້:

• ເປັນພືດປະດັບ: ຫຍ້າ ບາງຊະນິດກໍມີລັກສະນະທີ່ສວຍງາມ ເຊັ່ນ ລຳຕົ້ນ, ໃບ ແລະ ດອກ, ດັ່ງນັ້ນເມື່ອເຖິງຍາມທີ່ດອກເບັ່ງບານຈຶ່ງກາຍເປັນພືດປະດັບທີ່ມີຄວາມສວຍງານ ດຶງດູດຜູ້ຄົນໃຫ້ໄປທ່ຽວຊົມ ແລະ ຖ່າຍເກັບໄວ້ເປັນທີ່ລະນຶກ ຈົນບາງຄັ້ງກໍສາມາດກາຍເປັນສະຖານທີ່ທ່ອງງທ່ຽວໄດ້ເຊັ່ນດຽວກັນ.

• ເປັນສິ່ງປຸກສ້າງ: ຫຍ້າບາງຊະນິດເຊັ່ນ ຫຍ້າຄາ ມີເສັ້ນໄຍທີ່ດີ ສາມາດໃຊ້ເປັນວັດສະດຸສຳລັບສິ່ງປຸກສ້າງໄດ້ເຊັ່ນ ຫຼັງຄາ ແລະ ຖຽງນາເປັນຕົ້ນ

• ເປັນຢາ ແລະ ອາຫານ: ຫຍ້າເປັນພືດທີ່ໄດ້ພົບໄດ້ທົ່ວໄປ ແລະ ມີຈຳນວນຫຼາຍ ຈົນຖືກເບິ່ງຂ້າມເຖິງຄຸນປະໂຫຍດທີ່ສຳຄັນເຊັ່ນ ສັບພະຄຸນເປັນຍາ ປິ່ນປົວພະຍາດຕ່າງໆ, ແຕ່ເມື່ອໄດ້ມີການສຶກສາ ຈຶ່ງຮູ້ໄດ້ວ່າມີຫຍ້າຈຳນວນບໍ່ໜ້ອຍເລີຍທີ່ມີສັບພະຄຸນເປັນຢາດີພະຍາຫຼາຍດຢ່າງ ນອກຈາກນັ້ນຍັງເປັນອາຫານສັດໄດ້ເປັນຢ່າງດີ ແລະ ຄົນເຮົາກໍຍັງສາມາດບໍລິໂພກເປັນອາຫານໄດ້ອີກ

• ປ້ອງກັນການພັງທະລາຍຂອງດິນ: ດັ່ງທີ່ຫຼາຍຄົນຮູ້ກັນວ່າ ດິນເປັນທີ່ມາຂອງປັດໄຈ 4 ທີ່ມະນຸດເຮົາຕ້ອງການ ເຊິ່ງໄດ້ແກ່ ອາຫານ, ເຄື່ອນຸ່ງຫົ່ມ, ທີ່ຢູ່ອາໄສ ແລະ ຢາປົວພະຍາດ ຫຼື ອາດຈະກ່າວໄດ້ອີກຢ່າງໜຶ່ງວ່າ: ດິນຈະມີຄວາມສຳຄັນຕໍ່ມະນຸດທາງເສດຖະກິດສັງຄົມ ແລະ ການເມືອງ ດັ່ງນັ້ນການບຳລຸງຮັກສາ ແລະ ປ້ອງກັນການພັງທະລາຍຂອງດິນຈຶ່ງເປັນສິ່ງຈຳເປັນ ແລະ ສຳຄັນ ເຊິ່ງການປູກຫຍ້າກໍເປັນອີກໜຶ່ງວິທີທີ່ຊ່ວຍໄດ້ ເຊັ່ນ ແຝກຫອມ ມີລະບົບຮາກ ທີ່ຂະຫຍາຍດີ ຈຶ່ງມັກຖືກນຳມາປູກ ເປັນພືດຕ້ານດິນເຈື່ອນນັບມື້ນັບຫຼາຍຂຶ້ນ.

ດັ່ງທີ່ໄດ້ກ່າວໄວ້ຂ້າງເທິງວ່າຫຍ້າມີຄຸນປະໂຫຍດທີ່ສຳຄັນຫຼາຍດ້ານ ແຕ່ວ່າຫຍ້າແຕ່ລະຊະນິດກໍມີປະໂຫຍດແຕກຕ່າງກັນ ດັ່ງຕໍ່ໄປນີ້

ຕົ້ນຫຍ້າຍຸບ: ຊ່ວຍແກ້ອາການອ່ອນເພຍ, ເປັນຢາອາຍຸວັດທະນະ, ເບື່ອອາຫານ, ມີອາການເຈັບປວດເມື່ອຍຕາມຕົນໂຕ, ແລະ ເລືອດຈາງ

ຫຍ້າກະຈ້ອນ: ແຕ່ກ່ອນເຄີຍມີການສົ່ງເສີມການປູກເພື່ອໃຊ້ເປັນວັດຖຸດິບໃນການຜະລິດເຈ້ຍ, ປູກເປັນອາຫານສັດ ຕົວຢ່າງ ງົວ ແລະ ຄວາຍ. ນອກນັ້ນໃຊ້ປູກເປັນພືດຄຸມດິນປ້ອງກັນການພັງທະລາຍຂອງດິນ. (ປັດຈຸບັນພືດກຸ່ມນີ້ໄດ້ກາຍເປັນພືດຊະນິດບຸກລຸກ ເນື່ອງຈາກເປັນພືດທີ່ຂະຫຍາຍຕົວໄດ້ໄວ ແລະ ກຳຈັດໄດ້ຍາກ)

ຫຍ້າຄອບ ຫຼື ຫຍ້າຣີແພ: ໃຊ້ປູກເປັນອາຫານສັດເຊັ່ນ: ງົວ, ຄວາຍ. ເປັນພືດເສດຖະກິດສະໝຸນໄພຕົວໃໝ່ ຊ່ວຍຮັກສາສົມດູນ ແລະ ຊ່ອມແຊມໂຄງສ້າງກະດູກ ແລະ ກ້າມເນື້ອໃນຮ່າງກາຍ, ລວມເຖິງຊ່ວຍໃນການດູດຊຶມແຮ່ທາດທີ່ສໍາຄັນຕໍ່ລະບົບກະດູກ ແລະ ກ້າມຊີ້ນ

ຫຍ້າຂີ້ກາກ: ຕົ້ມນໍ້າດື່ມຊ່ວຍບໍາລຸງກໍາລັງ, ໃຊ້ເປັນຢາພາຍນອກຮັກສາຂີ້ກາກ ແລະ ດອກຍັງເປັນດອກໄມ້ປະດັບງາມເຫຼືອງທົ່ວທົ່ງ

ຫຍ້າຄາ: ເປັນວັດສະດຸທີ່ສາມາດນຳໄປມຸງຫຼັງຄາ, ຫືຼ ໃຊ້ແອມເຮືອນປູກເຫັດໄດ້, ເສັ້ນໃຍຂອງມັນມີຄຸນນະພາບດີ ສາມາດບັງແດດຝົນໄດ້ຫຼາຍປີພໍສົມຄວນ ຖ້າເກັບເອົາຫຍ້າທີ່ແກ່ດີ ແລະ ສິ່ງສຳຄັນແມ່ນເມື່ອໝົດອາຍຸການໃຊ້ງານແລ້ວແມ່ນສາມາດຍ່ອຍສະຫຼາຍຕາມທຳມະຊາດ ເປັນມິດຕໍ່ສິ່ງແວດລ້ອມ

ຫຍ້າຍຸບ 
Mimosa pudica L. / Fabaceae