7 ອາຫານຊ່ວຍໃຫ້ຜົມຍາວໄວຂຶ້ນ

Last updated on November 24, 2024
(first published: November 24, 2024)
by Sakhone INTHAVONG

ຢາກໃຫ້ຜົມຍາວໄວ ແລະ ຜົມດົກ 7 ອາຫານນີ້ຊ່ວຍໄດ້

ການມີຜົມທີ່ສວຍງາມ ແລະ ດົກໜາຄົງຈະເປັນຄວາມປາຖະໜາຂອງຫຼາຍຄົນ ການຮັກສາບຳລຸງຜົມຈຶ່ງເປັນສິ່ງສຳຄັນ ແລະ ສາມາດເຮັດໄດ້ດ້ວຍຫຼາຍວິທີ ນັບທັງການໃຊ້ສະໝຸນໄພຕ່າງໆ ຫຼື ການຮັກສາຜົມດ້ວຍການໃຊ້ຜະລິດຕະພັນຕ່າງໆ ແລະ ທີ່ສໍາຄັນແມ່ນການກິນອາຫານກໍເປັນປັດໃຈໜຶ່ງໃນການຊ່ວຍບຳລຸງຜົມໃຫ້ສວຍງາມ ແລະ ດົກໜາ ດັ່ງນັ້ນເຮົາມາເບິ່ງວ່າມີອາຫານປະເພດໃດແດ່?

ໄຂ່

ການກິນໄຂ່ໂດຍສະພາະແມ່ນໄຂ່ແດງແມ່ນມີສານອາຫານທີ່ຈຳເປັນສຳລັບເສັ້ນຜົມ ເປັນຕົ້ນແມ່ນໂປຣຕິນ ແລະ ໄບໂອດິນ ດັ່ງນັ້ນຈຶ່ງເຫັນວ່າມີຜະລິດຕະພັນບາງຊະນິດຈະມີສ່ວນປະສົມຂອງໄຂ່ແດງ ນອກຈາກຈະຊ່ວຍບຳລຸງເສັ້ນຜົມໃຫ້ແຂງແຮງແລ້ວ ຍັງສາມາດຊ່ວຍບຳລຸງຮາກຜົມ ແລະ ຫຼຸດການລົ່ນຂອງຜົມໄດ້ອີກດ້ວຍ.

ນ້ຳເຕົ້າຫູ້

ໃນນ້ຳເຕົ້າຫູ້ນັ້ນມີສານໄອໂຊຟາໂວນ ທີ່ສາມາດກະຕຸ້ນໃຫ້ເສັ້ນຜົມຍາວໄວຂຶ້ນ ນອກຈາກນັ້ນຍັງຊ່ວຍປັບຄວາມສົມດຸນການເກີດໄຂມັນໃນຮ່າງກາຍ.

ໝາກຄາຍ

ໝາກຄາຍມີສານໄບໂອດິນເຊັ່ນກັນໃນການຊ່ວຍບຳລຸງເສັ້ນຜົມໃຫ້ແຂງແຮງ ແລະ ຊ່ວຍຮັກສາເສັ້ນຜົມບໍ່ໃຫ້ຫຼົ່ນໄດ້ງ່າຍ. ນອກຈາກນັ້ນຍັງຊ່ວຍໃຫ້ຜົມຍາວໄວຂຶ້ນ.

ຫົວກາລົດ

ໃນຫົວກາລົດມີສານອາຫານທີ່ມີປະໂຫຍດຕ່າງໆເຊັ່ນ ເບຕ້າແຄໂຣທິນ, ວິຕາມິນຊີ, ວິຕາມິນອີ ແລະ ແຄລຊ່ຽມ, ໂພແທສຊ່ຽມ, ຟອສຟໍຣັສ, ທາດເຫຼັກ ສານອາຫານເຫຼົ່ານີ້ລ້ວນເປັນສານສຳຄັນທີ່ເຮັດໃຫ້ເສັ້ນຜົມແຂງແຮງ, ຊ່ວຍຫຼຸດຜ່ອນການແຕກປາຍຂອງເສັ້ນຜົມ.

ແກ່ນໝາກອຶ

ໃນແກ່ນໝາກອຶມີສານອາຫານທີ່ຈຳເປັນຕໍ່ເສັ້ນຜົມ ທີ່ສາມາດຊ່ວຍຫຼຸດຜ່ອນການຫຼົ່ນຂອງເສັ້ນຜົມ.

ໝາກຫຸ່ງ

ໃນໝາກຫຸ່ງກໍຄືກັບຫົວກາລົດທີ່ມີເບຕ້າແຄໂຣທິນຫຼາຍ ເຊິ່ງຊ່ວຍໃຫ້ເສັ້ນຜົມສວາຍງາມ, ຫຼຸດຜ່ອນການຫຼົ່ນ ນອກຈາກຈະຊ່ວຍບຳລຸງເສັ້ນຜົມແລ້ວຍັງຊ່ວຍບຳລຸງຜິວພັນໃຫ້ຂາວໃສຂຶ້ນ ທີ່ສຳຄັນຍັງເພີ່ມພູມຄຸ້ມກັນແກ່ຮ່າງກາຍອີກດ້ວຍ.

ກະລ່ຳດອກ

ກະລ່ຳດອກເປັນພືດທີ່ມີວິຕາມິນຊີ ແລະ ໂປຣຕິນສູງ ເຊິ່ງເປັນສານອາຫານທີ່ສຳຄັນຂອງເສັ້ນຜົມ ເພາະໃນເສັ້ນຜົມນັ້ນມີສ່ວນປະກອບຂອງໂປຣຕິນຫຼາຍ ດັ່ງນັ້ນເມື່ອຮ່າງກາຍໄດ້ຮັບໂປຣຕິນພຽງພໍຈຶ່ງສົ່ງຜົນໃຫ້ເສັ້ນຜົມແຂງແຮງ ແລະ ຊ່ວຍກະຕຸ້ນໃຫ້ຜົມຍາວໄວ.