December 5, 2024
ການສົ່ງອອກ 9 ເດືອນ ປີ 2020 ຂອງແຂວງຈຳປາສັກ ຫຼຸດລົງ 3%. ໃນນີ້, ສິນຄ້າອຸດສາຫະກໍາປຸງແຕ່ງ ຫຼຸດລົງ 20% ໂດຍສະເພາະຢາງພາລາ ຫຼຸດລົງ 35%, ກາເຟສໍາເລັດຮູບ ຫຼຸດລົງ 24%, ກາເຟຂົ້ວ ຫຼຸດລົງ 50%.
ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກຳ ແລະ ການຄ້າ ແຂວງ ຈຳປາສັກ ໄດ້ກ່າວວ່າ: ການສົ່ງເສີມການສົ່ງອອກ ແລະ ການຜະລິດທຸລະກິດຂອງຫົວໜ່ວຍວິສາຫະກິດພາຍໃນແຂວງ ໄດ້ມີຜົນສໍາເລັດໃນຫຼາຍດ້ານສະແດງອອກໃນບັນດາຄາດໝາຍທີ່ຍາດມາໄດ້ ດັ່ງນີ້: ຈໍານວນໂຮງງານອຸດສາຫະກໍາ ແລະ ຫັດຖະກໍາທັງໝົດ 1.691 ແຫ່ງ ລວມມູນຄ່າການລົງທຶນທັງໝົດ 2.760 ຕື້ກີບ, ມີຈໍານວນແຮງງານທັງໝົດ 7.383 ຄົນ, ລວມຍອດການຜະລິດຕະພັນອຸດສາຫະກໍາ ແລະ ຫັດຖະກໍາ ບັນລຸໄດ້ 2.872 ຕື້ກີບ; ລວມຍອດການຈໍາໜ່າຍຜະລິດຕະພັນອຸດສາຫະກໍາ ແລະ ຫັດຖະກໍາ ບັນລຸໄດ້ 3.878 ຕື້ກີບ.
ວຽກງານສົ່ງເສີມການລົງທຶນໃນກິດຈະການທົ່ວໄປ ຫົວໜ່ວຍວິສາຫະກິດໃນທົ່ວແຂວງຈໍາປາສັກ ມີທັງໝົດ 14.469 ຫົວໜ່ວຍ ມູນຄ່າທຶນຈົດທະບຽນ 11.828 ຕື້ກວ່່າກີບ; ຕະຫຼາດທັງໝົດ ມີຈໍານວນ 47 ແຫ່ງ. ໃນນັ້ນ, ຕະຫຼາດໃຫຍ່ 1 ແຫ່ງ, ຕະຫຼາດກາງ 3 ແຫ່ງ ແລະ ຕະຫຼາດນ້ອຍ 43 ແຫ່ງ; ຮ້ານຄ້າຂາຍຍົກ – ຂາຍຍ່ອຍ ມີຈໍານວນ 2.340 ຫົວໜ່ວຍ ມີມູນຄ່າທຶນຈົດທະບຽນທັງໝົດ 64,94 ຕື້ກີບ.
ສຳລັບມູນຄ່າການສົ່ງອອກ, ນໍາເຂົ້າທັງໝົດ ແລະ ມູນຄ່າການຄ້າຊາຍແດນຂອງແຂວງຈໍາປາສັກ ສາມາດບັນລຸໄດ້ທັງໝົດ 388 ລ້ານກວ່່າໂດລາສະຫະລັດ, ທຽບໃສ່ໄລຍະດຽວກັນ ຫຼຸດລົງ 9%, ທຽບໃສ່ແຜນປີ 2020 ປະຕິບັດໄດ້ 70%. ໃນນີ້, ການນໍາເຂົ້າມີມູນຄ່າ 177 ລ້ານກວ່າໂດລາ ສິນຄ້ານໍາເຂົ້າຫຼາຍກ່ອນໝູ່ນໍ້າມັນເຊື້ອໄຟ ກວມເອົາ 90% ຂອງມູນຄ່າການນໍາເຂົ້າ, ຮອງລົງມາສິນຄ້າຟຸມເຟືອຍ 3% ແລະ ພາຫະນະ, ອາໄຫຼ່ 12%.
ສ່ວນການສົ່ງອອກມີມູນຄ່າ 210 ລ້ານກວ່າໂດລາ, ສິນຄ້າສົ່ງອອກຫຼາຍກວ່າໝູ່ ສິນຄ້າ Contract Farming ກວມເອົາ 57% ຂອງການສົ່ງອອກທັງໝົດ, ຮອງລົງມາກາເຟ 36% ແລະ ກະສິກໍາອື່ນໆ 7%.
ທ່ານກ່າວຕື່ມວ່າ: ສັງລວມແລ້ວການສົ່ງອອກທັງໝົດ ປະຕິບັດ 9 ເດືອນ ປີ 2020 ຫຼຸດລົງ 3%, ສິນຄ້າທີ່ສົ່ງອອກຕົ້ນຕໍແມ່ນສິນຄ້າກະສິກໍາ ( ວັດຖຸດິບ ), ຜະລິດຕະພັນອຸດສາຫະກໍາປຸງແຕ່ງ ( ສໍາເລັດຮູບ ), ພືດຜັກທີ່ນອນໃນໂຄງການ Contract Farming.
ສາເຫດຕົ້ນຕໍທີ່ເຮັດໃຫ້ມູນຄ່າການສົ່ງອອກຫຼຸດລົງ ຍ້ອນຍັງຢູ່ໃນໄລຍະການປະຕິບັດມາດຕະການປ້ອງກັນການລະບາດຂອງພະຍາດໂຄວິດ – 19 ໃນຫຼາຍປະເທດ, ການສົ່ງອອກສິນຄ້າອຸດສາຫະກໍາປຸງແຕ່ງ ຫຼຸດລົງ 20% ໂດຍສະເພາະຢາງພາລາ ຫຼຸດລົງ 35%, ການສົ່ງອອກໄມ້ ແລະ ຜະລິດຕະພັນໄມ້ ຫຼຸດລົງ 26%, ກາເຟສໍາເລັດຮູບ ຫຼຸດລົງ 24%, ກາເຟຂົ້ວ ຫຼຸດລົງ 50%.
ສ່ວນຄາດໝາຍສູ້ຊົນການຈັດຕັ້ງປະຕິບັດ 3 ເດືອນ ທ້າຍປີ 2020 ພະແນກອຸດສາຫະກຳ ແລະ ການຄ້າ ພວກເຮົາຈະເອົາໃຈໃສ່ສູ້ຊົນເຮັດໃຫ້ມູນຄ່າການສົ່ງອອກ ບັນລຸ 101 ລ້ານກວ່າໂດລາ, ມູນຄ່າການນໍາເຂົ້າທັງໝົດໃຫ້ບັນລຸ 126 ລ້ານກວ່າໂດລາ.
