ກຸ່ມໝາກໄມ້ 5 ສີ
ກຸ່ມໝາກໄມ້ສີແດງ/ບົວປົນມ່ວງ: ມີສານໄລໂຄບີນ (lycopene) ແລະ ບີທາເລນ (betalain) ຊຶ່ງເປັນສານຕ້ານອານຸມູນອິດສະຫຼະ ຊ່ວຍປ້ອງກັນພະຍາດມະເຮັງ ແລະ ເຮັດໃຫ້ຫົວໃຈແຂງແຮງ ພົບໄດ້ໃນໝາກໂມ, ໝາກເລັ່ນ, ໝາກມັງກອນແດງ, ໝາກຕາກົບ, ໝາກສະຕໍເບີລີ່, ໝາກສີດາ ແລະ ໝາກຫຸ່ງແດງ.
ກຸ່ມໝາກໄມ້ສີມ່ວງ: ມີສານແອນໂທໄຊຍານິນ (Antocyanin) ແລະ ກຸ່ມໂພລິພີນອຣ (polyphenol) ຊຶ່ງເປັນສານຕ້ານອານຸມູນອິດສະຫຼະຊ່ວຍປ້ອງກັນພະຍາດມະເຮັງ ແລະ ການເກີດໄຂມັນອຸດຕັນໃນເສັ້ນເລືອດ ຊ່ວຍຫຼຸດຜ່ອນການເສື່ອມຂອງຈຸລັງໃຫ້ຊ້າລົງ, ໄດ້ແກ່ໝາກໄມ້ຈຳພວກໝາກລະແຊັງແດງ, ໝາກຊົມພູ່, ໝາກໝັ້ນ ແລະ ໝາກຫວ້າ.
ກຸ່ມໝາກໄມ້ສີຂຽວ: ກຸ່ມໝາກໄມ້ສີຂຽວ ນອກຈາກສານຄລໍໂຣຟິວແລ້ວ, ຍັງມີສານລູທີນ ທີ່ຊ່ວຍຕ້ານອານຸມູນອິດສະຫຼະ ປ້ອງກັນພະຍາດມະເຮັງ ແລະ ຫຼຸດຜ່ອນການເສື່ອມຂອງປະສາດຕາ ພົບໄດ້ໃນໝາກສີດາ, ອາໂວກາໂດ, ໝາກແຕງ, ລະແຊັງຂຽວ, ຊົມພູ່ຂຽວ, ກະທັນ, ແອັບເປິ່ນຂຽວ ແລະ ໝາກກອກນ້ຳ.
ກຸ່ມໝາກໄມ້ສີຂາວ ຫຼື ນ້ຳຕານ: ຊ່ວຍຕ້ານອານຸມູນອິດສະຫຼະ ລົດການແບ່ງໂຕຂອງຈຸລັງມະເຮັງ, ຕ້ານການອັກເສບ, ຫຼຸດຜ່ອນການປວດຫົວເຂົ່າ, ພົບຫຼາຍໃນໝາກ ແລະ ເປືອກມັງຄຸດ, ສີດາ, ແອັບເປິ່ນ, ມັງກອນຂາວ ແລະ ຍັງມີໝາກໄມ້ຊະນິດອື່ນໆອີກເຊັ່ນ: ກ້ວຍ, ລອງກອງ, ລິ້ນຈີ່, ແລະ ໝາກກະທັນ.
ກຸ່ມໝາກໄມ້ສີເຫຼືອງ ຫຼື ສົ້ມ
ມີສານເບຕ້າແຄໂລທີນສູງ ຊ່ວຍໃນການຕ້ານອານຸມູນອິດສະຫຼະ ປ້ອງກັນພະຍາດມະເຮັງ ຊ່ວຍຕ້ານການອັກເສບ ແລະ ເພີ່ມລະບົບພູມຄຸ້ມກັນ ພົບຫຼາຍໃນໝາກມ່ວງສຸກ, ໝາກກອກສຸກ, ໝາກກ້ວຍ, ແລະ ໝາກນັດເປັນຕົ້ນ.
ຂໍ້ມູນຈາກ ປຶ້ມຄຸນຄ່າທາງໂພຊະນາການໃນໝາກໄມ້
