ແມງແຄງພິຄາດ ຫຼື ໂຕຫ້ຳ ( ແມງໄມ້ກິນແມງ ) ມີບົດບາດໃນການຄວບຄຸມ ແລະ ກຳຈັດຝູງບົ້ງສາລີ (ໂດຍສະເພາະໃນໄລຍະທີ່ຍັງເປັນໂຕບົ້ງ) ທີ່ເປັນສັດຕູຮ້າຍແຮງຂອງສາລີ ທີ່ສຳຄັນມັນຈະບໍ່ທຳລາຍແມງໄມ້ທີ່ມີປະໂຫຍດເຊັ່ນ: ແຕນບຽນ, ໂຕຫ້ຳຊະນິດອື່ນ ແລະ ແມງໄມ້ປະສົມເກສອນ ສະນັ້ນທາງເລືອກໃນການໃຊ້ແມງໄມ້ຊະນິດນີ້ໃນການກຳຈັດສັດຕູພືດຖືເປັນທາງເລືອກໜຶ່ງທີ່ໄດ້ຮັບຜົນ ແລະ ປອດໄພຕໍ່ສິ່ງແວດລ້ອມ ລວມເຖິງຊາວກະສິກອນຜູ້ປູກສາລີອີກດ້ວຍ. ສະນັ້ນພວກເຮົາຈຶ່ງນຳເອົາວິທີການລ້ຽງແມງແຄງພິຄາດມາຝາກກັນເຊິ່ງມີດັ່ງນີ້:
ອຸປະກອນມີ:
- ກ່ອງຢາງ ຫຼື ແບບແກ້ວໃສ ( ເຈາະປ່ອງ ແລະ ໃສ່ຕາໜ່າງຖີ່).
- ສຳລີ (ສຳລັບຊຸບນ້ຳໃຫ້ແມງແຄງພິຄາດ).
- ຖາດ, ຟອຍຂະໜາດນ້ອຍ, ມີດຕັດ, ຄັດເຕີ້.
- ອາຫານສຳລັບການລ້ຽງຄື ໜອນນົກຊະນິດ Zophobas morio Fabricius.
- ໂຕະ ຫຼື ຊັ້ນວາງລ້ຽງແມງແຄງພິຄາດ.
- ໃບໄມ້ຈິງ ຫຼື ແບບປອມກໍໄດ້ (ເປັນບ່ອນລີ້ອາໄສຂອງແມງແຄງພິຄາດ).
- ຫ້ອງລ້ຽງ (ທີ່ສາມາດຄວບຄຸມອຸນຫະພູມໄດ້ດີ).
ຂັ້ນຕອນການລ້ຽງມີຄື:
- ນຳແມງແຄງພິຄາດປະມານ 4-5 ໂຕ ແລະ ໜອນນົກ 1-2 ໂຕ ລົງໃນກ່ອງ.
- ເມື່ອແມງພິຄາດວາງໄຂ່ໃຫ້ແຍກພໍ່ແມ່ພັນອອກ.
- ໄລຍະທີ 1-2 ແມງແຄງຈະຍັງບໍ່ທັນກິນອາຫານ.
- ໄລຍະທີ 3 ແມງແຄງຈະເລີ່ມກິນໜອນນົກຈຳນວນຫຼາຍ ແລະ ແຂງແຮງສາມາດລ່າເຫຍື່ອໄດ້ໄວ ແລະ ຫຼາຍ.
- ໄລຍະ 4-5 ມັນຈະກິນອາຫານເພີ່ມຂຶ້ນເລື້ອຍໆ. (ໃນໄລຍະນີ້ຄວນໃຫ້ອາຫານພຽງພໍ ບໍ່ດັ່ງນັ້ນ ມັນຈະກິນກັນເພື່ອຄວາມຢູ່ລອດ)
- ຫຼັງຈາກໂຕເຕັມທີ່ແມ່ນໃຫ້ນຳໄປແຍກກ່ອງໃໝ່ເພື່ອຂະຫຍາຍພັນຕໍ່ໄປ.
ສຳລັບໄລຍະການນຳແມງພິຄາດໄປປ່ອຍໃນພື້ນທີ່ການລະບາດຂອງຝູງບົ້ງສາລີແມ່ນໄລຍະທີ 3 ຂອງການລ້ຽງ ໂດຍການປ່ອຍ ແມ່ນ 1.000 ໂຕ/ໄລ່.
ຂໍ້ມູນຈາກ: ສູນປ້ອງກັນພືດ, ກົມປູກຝັງ, ກະຊວງກະສິກຳ ແລະ ປ່າໄມ້
