ການໃຊ້ຢາປາບສັດຕູພືດຈາກທຳມະຊາດແມ່ນວິທີມີຄວາມປອດໄພຈາກສານເຄມີ, ປະຢັດງົບ ແລະ ຍັງມີປະສິດທິພາບໃນການຄວບຄຸມສັດຕູພືດ ເຊິ່ງເຮົາສາມາດປຸງແຕ່ງດ້ວຍຫຼາຍວິທີ ແລະ ສ່ວນປະກອບຫຼາຍຢ່າງຈາກທຳມະຊາດທີ່ເຮົາສາມາດຫາໄດ້ງ່າຍ ທັງເປັນມິດກັບສິ່ງແວດລ້ອມ, ຜູ້ປູກປອດໄພຈາກສານເຄມີ ທີສຳຄັນຍັງມີປະໂຫຍດຕໍ່ສຸຂະພາບຜູ້ບໍລິໂພກອີກດ້ວຍ. ດັ່ງນັ້ນພວກເຮົາຈຶ່ງນຳເອົາສູດນ້ຳຢາປາບສັດຕູມາຝາກເຊິ່ງມີດັ່ງນີ້:
ສະເປຈາກໝາກເຜັດ/ຫົວກະທຽມ
ວິທີເຮັດ:
ນຳໝາກເຜັດ 1 ກິໂລ ມາບົດປົນກັບຫົວກະທຽມ 1 ກິໂລ ແລະ ໃບຢາສູບ 1-2 ໃບ ( ຫຼືໃຊ້ຢາສູບ 2 ກອກ ກໍໄດ້) ຫຼັງຈາກນັ້ນນຳເຫຼົ້າຂາວ 1 ລິດມາປະສົມເຂົ້າກັນແລ້ວປະໄວ້ 1 ອາທິດ. ຫຼັງຈາກນັ້ນໃຫ້ຕອງເອົາພຽງນ້ຳຂອງມັນໄວ້ເພື່ອໃຊ້. ເຊິ່ງສັດຕູພືດທີ່ສາມາດຄຸມໄດ້ມີ: ບົ້ງ, ເພ້ຍໄຟ, ໄຮແມງມຸມແດງ, ແມງມີ່ຂາວ, ຕັກແຕນ, ມົດ ແລະ ປວກ ຍົກເວັ້ນເພ້ຍທີ່ບໍ່ສາມາດກຳຈັດໄດ້.
ສະເປນ້ຳໝາກນາວ
ວິທີເຮັດ:
ນຳເຫຼົ້າຂາວ 1 ລິດ ມາປະສົມກັບ ນ້ຳໝາກນາວ 0,5 ລິດ, ນ້ຳສະກັດຊີວະພາບ 0,5 ລິດ ແລະ ກາກນ້ຳຕານ 0,5 ລິດ ແລ້ວປະໄວ້ 1 ວັນ. ສຳລັບການໃຊ້ແມ່ນໃຫ້ນຳເອົານ້ຳຢາ 10 ມິນລີລິດ (1-2 ບ່ວງແກງ) ປະສົມກັບນ້ຳ 10 ລິດ, ນ້ຳຢາແມ່ນສາມາດຮັກສາໄວ້ໃຊ້ນານເຖິງ 6 ເດືອນໂດຍການເກັບໄວ້ບ່ອນມືດ ແລະ ແຫ້ງດີ ສ່ວນສັດຕູພືດທີ່ສາມາດກຳຈັດໄດ້ ໄດ້ແກ່ແມງລີ້ນໝາ, ຫອຍທາກ, ໜອນ ແລະ ໄຮແມງມຸມແດງ.
ຂໍ້ມູນຈາກ: ສວນພຶກສາຊາດຜາຕັດແກ້ວ(ຫຼວງພະບາງ)
