ການກະກຽມໜອງ
ໜອງທີ່ໃຊ້ໃນການລ້ຽງກຸ້ງຕ້ອງມີຂະໜາດເໝາະສົມ, ໜອງບໍ່ເກີນ 3 ໄລ່, ເລິກປະມານ 80 ຊມ ແລະ ຕ້ອງກວດສອບໃຫ້ດີກ່ອນນໍາກຸ້ງລົງໜອງວ່າມີສັດນໍ້າອື່ນຢູ່ໃນໜອງບໍ່, ເພາະຖ້າມີ ສັດເຫຼົ່ານັ້ນອາດຈະກິນກຸ້ງ ຫຼື ອາຫານຂອງກຸ້ງທີ່ນໍາລົງໄປລ້ຽງໃນໜອງໄດ້ ແລະ ຈາກນັ້ນຕ້ອງກວດສອບສະພາບຂອງນໍ້າໃຫ້ລະອຽດວ່າມີຄ່າ pH ບໍ່ໃຫ້ຕໍ່າ ຫຼື ສູງເກີນໄປ, ຄ່າ pH ທີ່ເໝາະສົມຄວນຢູ່ລະຫວ່າງ 7-8.5.
ການນໍາກຸ້ງລົງໜອງ
ຫຼັງຈາກທີ່ກວດສອບຄວາມພ້ອມຂອງນໍ້າ ແລະ ໜອງເປັນທີ່ຮຽບຮ້ອຍແລ້ວກໍ່ສາມາດນໍາກຸ້ງລົງລ້ຽງໄດ້ເຊິ່ງໜອງທີ່ມີຂະໜາດ 1 ໄລ່ ສາມາດໃສ່ກຸ້ງໄດ້ປະມານ 300.000 ໂຕ, ຈະເລີ່ມລ້ຽງກຸ້ງໃນລະຫວ່າງເດືອນ 4-5 ຂອງທຸກໆປີ, ຫຼັງຈາກນັ້ນແມ່ນນໍາໄປລ້ຽງຕໍ່ອີກປະມານ 7 ເດືອນ ກໍ່ສາມາດນໍາອອກຂາຍໄດ້.
ການໃຊ້ໃບພັດໃນໜອງ
ການໃຊ້ໃບພັດໃນໜອງລ້ຽງກຸ້ງເປັນການເພີ່ມອອກຊີເຈນໃຫ້ກັບນໍ້າໃນໜອງເຊິ່ງມັນເປັນການດີຕໍ່ກຸ້ງ ເພາະກຸ້ງບໍ່ມັກຢູ່ບ່ອນນໍ້ານິ່ງ ແລະ ເຮັດໃຫ້ນໍ້າບໍ່ເສຍໄວ ບໍ່ຕ້ອງປ່ຽນນໍ້າຫຼາຍຄັ້ງ.
ອາຫານ
ອາຫານທີ່ໃຊ້ລ້ຽງກຸ້ງຈະມີລັກສະນະເປັນເມັດນ້ອຍໆ, ການໃຫ້ອາຫານກຸ້ງທີ່ຢູ່ໃນໜອງລ້ຽງແມ່ນຈະໃຫ້ມື້ລະ 2 ຄັ້ງຄື: ຕອນເຊົ້າ ແລະ ຕອນແລງ, ສ່ວນການໃຫ້ອາຫານກຸ້ງໃຫຍ່ທີ່ມີອາຍຢເກີນ 3 ເດືອນແມ່ນໃຫ້ມື້ລະ 3 ຄັ້ງຄື: ຕອນເຊົ້າ, ຕອນທ່ຽງ ແລະ ຕອນແລງ.
– ກຸ້ງທີ່ລ້ຽງໄດ້ປະມານ 7 ເດືອນຈະມີຂະໜາດໃຫຍ່ພໍທີ່ຈະນໍາໄປຂາຍໄດ້, ຈະມີການນໍາຂຶ້ນຈາກໜອງໂດຍໃຊ້ກະດຸ້ງ ຫຼື ແຫ.
ຂໍ້ມູນຈາກ: ຖານຂໍ້ມູນດິຈິຕອນ ເພື່ອການສົ່ງເສີມການພັດທະນາເສດຖະກິດ ແລະ ສັງຄົມ.
