ແກງຫອຍເປັນອາຫານທີ່ມີຊື່ສຽງໃນຫຼາຍຂົງເຂດ, ແຕ່ຂັ້ນຕອນການປຸງແຕ່ງຂອງແຕ່ລະທ້ອງຖິ່ນມີຄວສມໂດດເດັ່ນສະເພາະ ເຊັ່ນດຽວກັນກັບ ຊົນເຜົ່າສະລາງ ຢູ່ບ້ານວັງມາເນີ, ເມືອງບົວລະພາ, ແຂວງຄຳມ່ວນ ທີ່ໄດ້ມີວິທີການແຕ່ງອາຫານ ເມນູແກງຫອຍທີ່ມີຄວາມພິເສດສະເພາະຂອງຕົນ.
ສ່ວນປະກອບ:
- ຫອຍ 0,5 ກິໂລແກຣມ
- ຈີ່ນາຍ 0,3 ກິໂລແກຣມ
- ໜໍ່ໄມ້ 3 ໜໍ່
- ໝາກບວບ 1 ໜ່ວຍ
- ຫອມເປ 3-4 ໃບ
- ໝາກເຜັດ 2 ໜ່ວຍ
- ນໍ້າສະອາດ 1 ລິດ
- ເກືອ 1 ບ່ວງກາເຟ
ວິທີເຮັດ
- ຕັດໜໍ່ໄມ້ໃຫ້ມີຂະໜາດນ້ອຍ ແລ້ວນໍາໄປຕົ້ມໃຫ້ມັນຈືດ
- ນຳໝາກບວບມາປອກເປືອກ ແລະ ຕັດເປັນຕ່ອນໃຫ້ໄດ້ຂະໜາດຕາມຕ້ອງການ
- ນຳໜໍ່ໄມ້ທີ່ຕົ້ມແລ້ວ, ໝາກບວບ ແລະ ໝາກເຜັດໃສ່ໃນໝໍ້ ແລ້ວຕົ້ມປະມານ 3-4 ນາທີ
- ຕຳໝາກເຜັດ ແລະ ເກືອໃຫ້ລະອຽດ
- ເດັດປີກ ແລະ ໄສ້ຂີ້ຈີ່ນາຍ ຫຼັງຈາກນັ້ນນຳໄປລ້າງໃຫ້ສະອາດແລ້ວນຳໄປໃສ່ໝໍ້
- ຕັດກົ້ນຫອຍອອກເພື່ອງ່າຍໃນການຮັບປະທານ ແລ້ວໃຫ້ສະອາດ ຈາກນັ້ນນຳລົງໃນໝໍ້ປະສົມທຸກຢ່າງໃຫ້ເຂົ້າກັນ.
- ແກງປະໄວ້ປະມານ 10 ນາທີ.
- ໃສ່ຫອມເປລົງໝໍ້ໂດຍຕັດເປັນຕ່ອນຕາມຄວາມຕ້ອງການ ແລ້ວຄົນໃຫ້ເຂົ້າກັນ.
