ຈາກພູມປັນຍາສູ່ພາບຈິດຕະກໍາ ແກງໜໍ່ໄມ້ຖືໄດ້ວ່າ ແມ່ນໜຶ່ງໃນອາຫານທີ່ມີການສືບທອດກັນມາແຕ່ດຶກດຳບັນຈົນເຖິງປັດຈຸບັນ ແລະ ຍັງໄດ້ຮັບຄວາມນິຍົມບໍລິໂພກຢູ່ທຸກທ້ອງຖິ່ນຢ່າງຫຼວງຫຼາຍ.
ການແຕ້ມຮູບຈິດຕະກຳແມ່ນ ໜຶ່ງໃນງານສິລະປະທີ່ໄດ້ຮັບຄວາມນິຍົມ ໂດຍສະເພາະແມ່ນຜູ້ທີ່ມີພອນສະຫວັນໃນການແຕ້ມຮູບ, ບວກກັບແນວຄວາມຄິດສ້າງສັນໃນການຜະລິດຜົນງານອອກມາ ເຊັ່ນດຽວກັນກັບ ນາງ ຈັນ ທອງສີປະເສີດ ໜຶ່ງໃນນັກສຶກສາປີທີ 5 ຂອງ ສະຖາບັນວິຈິດສິນແຫ່ງຊາດ ໄດ້ແຕ້ມຮູບແກງໜໍ່ໄມ້ອອກມາ ເພື່ອສື່ໃຫ້ທຸກຄົນໄດ້ເຫັນເຖິງຄຸນຄ່າຂອງອາຫານ ແລະ ຄວາມອຸດົມສົມບູນທາງຊີວະນາໆພັນຂອງປະເທດເຮົາ.
ໃນໂອກາດດຽວກັນນີ້ ທ່ານ ນາງ ຈັນ ໄດ້ໃຫ້ຮູ້ວ່າ: ໃນການຜະລິດຜົນງານໃນຄັ້ງນີ້ແມ່ນເກີດມາຈາກຄວາມມັກ-ຮັກແກງໜໍ່ໄມ້ ບວກກັບການຢາກເຜີຍແຜ່ອາຫານທີ່ເປັນເອກະລັກຂອງບ້ານເຮົາໃຫ້ທຸກຄົນໄດ້ຮັບຮູ້ ໂດຍຜ່ານການແຕ້ມຮູບຈິດຕະກຳ.
ຊຶ່ງໃນການຜະລິດຜົນງານໃນຄັ້ງນີ້ໃຊ້ເວລາພຽງແຕ່ 3 ເດືອນເທົ່ານັ້ນ ໂດຍຈະແບ່ງອອກເປັນ 3 ພາກຄື: ພາກທີ 1 ເປັນຮູບພາບການສັງລວມ ແລະ ວິເຄາະຂໍ້ມູນປະຫວັດຄວາມເປັນມາຂອງໜໍ່ໄມ້, ພາກທີ 2 ແມ່ນຮູບພາບທີ່ມີການເກັບກໍາລາຍລະອຽດ ສ່ວນປະກອບຕ່າງໆຂອງແກງໜໍ່ໄມ້ ແລະ ພາກສຸດທ້າຍ ເປັນຮູບພາບທີ່ສຳເລັດການປຸງແຕ່ງແກງໜໍ່ໄມ້ພ້ອມຮັບປະທານ, ຊຶ່ງທັງ 3 ພາກນີ້ ພາກສຸດທ້າຍຖືໄດ້ວ່າເປັນໄລຍະທີ່ຍາກທີ່ສຸດ ເນື່ອງຈາກວ່າຕ້ອງໄດ້ເກັບກໍາລາຍລະອຽດຂອງຮູບພາບ.
ພ້ອມດຽວກັນນີ້ ທ່ານ ນາງ ຈັນ ຍັງໄດ້ເວົ້າຕື່ມອີກວ່າ ພາຍຫຼັງທີ່ຈົບການສຶກສາແລ້ວ ໃນອະນາຄົດແມ່ນຢາກຈະເປັນຄູສອນ ເພາະວ່າ ນອກຈາກຈະສາມາດແບ່ງປັນຄວາມຮູ້ ແລະ ຖ່າຍທອດປະສົບການຂອງຕົນເອງໃຫ້ຜູ້ອື່ນແລ້ວ ຍັງເປັນການພັດທະນາຝີມືໃນການແຕ້ມຮູບຈິດຕະກຳຂອງຕົນເອງໄດ້ໃນອານາຄົດ.
ແຫຼ່ງຂໍ້ມູນ: ນາງ ຈັນ ໄດ້ໃຫ້ສໍາພາດກັບທີມງານພາເຂົ້າລາວ ໃນວັນທີ 24 ສິງຫາ 2022.
