ສູນການສຶກສາ ແລະ ວັດທະນະທຳເດັກ (ສສວດ) ໄດ້ຈັດຂະບວນແຫ່ຜາສາດເຜິ້ງທີ່ບຸນນະມັດສະການພະທາດຫຼວງວຽງຈັນ ປະຈໍາປີ 2022 ທີ່ຜ່ານມານີ້ ຊຶ່ງນຳພາໂດຍທ່ານ ໄຊມຸງຄຸນ ຈັນທະປະເສີດ ປະທານສູນການສຶກສາ ແລະ ວັດທະນະທຳເດັກ ແລະ ພາກສ່ວນອື່ນໆທີ່ສົນໃຈເຂົ້າຮ່ວມ.
ໃນການແຫ່ຜາສາດເຜິ້ງໃນຄັ້ງນີ້ ນອກຈາກເປັນການສະເຫຼີມສະຫຼອງບຸນນະມັດສະການພະທາດຫຼວງແລ້ວ ຍັງເປັນການຮັກສາ ແລະ ສຶບທອດມູນເຊື້ອຮີດອອງປະເພນີອັນດີງາມຂອງຊາດລາວເຮົາໄວ້ ທັງເປັນການສ້າງຂະບວນຄວາມສາມັກຄີ ແລະ ຄວາມມ່ວນຊື່ນໃຫ້ແກ່ຜູ້ມວນຊົນ.
ປະເພນີແຫ່ຜາສາດເຜິ້ງ ຖືວ່າເປັນອີກກິດຈະກຳໜຶ່ງທີ່ໄດ້ສຶບທອດ ແລະ ປະຕິບັດໃນງານບຸນນະມັດສະການພະທາດຫຼວງມາເປັນເວລາຫຼາຍກວ່າ 4 ສັດຈະວັດທີ່ຜ່ານມາ ຊຶ່ງພິທີດັ່ງກ່າວແມ່ນຂະເລີ່ມໃນຕອນບ່າຍຂອງມື້ຂຶ້ນ 14 ຄ່ຳ ເດືອນ 12 ( ປະຕິທິນລາວ ) ໂດຍຈະມີການເຕົ້າໂຮມກັນຢູ່ທີ່ວັດສີເມືອງ ສະຖານທີ່ສັກກະລັກບູຊາຄູ່ບ້ານຄູ່ເມືອງຂອງຊາວນະຄອນຫຼວງວຽງຈັນ ກໍຄືຂອງຊາວລາວທົ່ວປວງຊົນ.
ຜາສາດເຜິ້ງທີ່ນຳມາແຫ່ນັ້ນແມ່ນເຮັດມາຈາກຕົ້ນກ້ວຍ, ໄມ້ ແລະ ອື່ນໆ ເຊິ່ງຈະປະດັບປະດາດ້ວຍດອກເຜິ້ງ ( ຂີ້ເຜິ້ງ ) ພ້ອມດ້ວຍເຄື່ອງໃຊ້ຕ່າງໆໂດຍສະເພາະແມ່ນ ປື້ມຂຽນ, ປາກກາ, ສໍດຳ ລວມທັງເງິນຈຳນວນຕາມສັດທາ ຖືກຈັດໄວ້ເປັນລະບຽບຮຽບຮ້ອຍ ເພື່ອສະແດງໃຫ້ເຫັນເຖິງຄວາມອຸດົມສົມບູນຂອງປະເທດລາວເຮົາ ທັງເປັນການໃຫ້ເຫັນເຖິງຄວາມສາມັກຄີພ້ອມກັນສຶບທອດເອກະລັກ ແລະ ປົກປັກຮັກສາຮີດຄອງປະເພນີອັນດີງາມຂອງລາວນີ້ໄວ້ໃຫ້ລູກຫຼານໄດ້ສຶບທອດຕໍ່ໄປໃນອະນາຄົດ.
ຂຽນໂດຍ: ບົວວອນ ທິບພາວັນ
