ເພື່ອໃຫ້ໄດ້ດິນທີີ່ມີຄຸນນະພາບ ການກວດສຸຂະພາບດິນກໍ່ມີຄວາມສໍາຄັນ ໂດຍສະເພາະແມ່ນການວິໄຈດິນ ຖືໄດ້ວ່າເປັນໝາກຫົວໃຈຫຼັກທີ່ສຳຄັນຂອງການເຮັດກະສິກຳ (ປູກຝັງ, ລ້ຽງສັດ) ເນື່ອງຈາກວ່າການວິໄຈດິນກ່ອນປູກ ຈະເຮັດໃຫ້ຮູ້ເຖິງຄວາມອຸດົມສົມຂອງດິນ, ດິນເໝາະແກ່ການປູກພືດຊະນິດໃດ ແລະ ໃສຝຸ່ນແນວໃດ ເພື່ອໃຫ້ພຽງພໍກັບຄວາມຕ້ອງການຂອງພືດທີປູກ ທັງຍັງຊ່ວຍໃຫ້ ຊາວກະສິກອນປະຢັດລາຍຈ່າຍ ແລະ ໄດ້ຮັບຜົນຜະລິດຫຼາຍຂື້ນ.
ຕາມການລາຍງານຂອງກອງປະຊຸມລາຍງານການເຄື່ອນໄຫວວຽກວິຊາການຂອງ ກົມຄຸ້ມຄອງ ແລະ ພັດທະນາທີດິນກະສິກຳ ເມື່ອວັນທີ 16 ມີນາທີ່ຜ່ານມານີ້ ທ່ານ ປອ ນີວົງ ສີປະເສີດຫົວໜ້າກົມຄຸ້ມຄອງ ແລະ ພັດທະນາທີດິນກະສິກໍາໄດ້ໃຫ້ຮູ້ວ່າ: ຢູ່ ສປປລາວ ມີຫ້ອງວິໄຈດິນ ທີ່ມີຄຸນນະພາບ, ມີເຄື່ອງມືທີທັນສະໄໝ, ມີວິຊາການທີ່ມີປະສົບການສາມາດວິໄຈດິນ, ພືດ ແລະ ຝຸ່ນ ບໍ່ຈຳເປັນຕ້ອງສົ່ງໄປວິໄຈຢູ່ປະເທດໃກ້ຄຽງເຊັ່ນ: ໄທ, ຫວຽດ ຄືແຕ່ກ່ອນ ຊ່ວງໄລຍະທີ່ມີການແຜ່ລະບາດຂອງພະຍາດໂຄວິດ-19 ເມື່ອ 2-3 ປີຜ່ານມາ ເຮັດໃຫ້ຄົນລາວສ່ວນໃຫ່ຍ ໄດ້ໃຫ້ຄວາມສົນໃຈໃນເລື່ອງ ການປູກຝັງ, ລ້ຽງສັດຫຼາຍຂື້ນ ແຕ່ກໍຍັງຂາດເຕັກນິກໃນການຜະລິດກະສິກຳ, ຂາດວິທະຍາສາດທີດີ ແລະ ຖືກຕ້ອງ ລວມເຖິງການວິໄຈດິນ ຍັງເຮັດແບບປະຖົມປະຖານ, ຕາມຄວາມຊີນເຄີຍທີພໍ່ແມ່ພາເຮັດ ຈຶ່ງເຮັດໃຫ້ໄດ້ຮັບຜົນຜະລິດບໍ່ໄດ້ດີເທົ່າທີ່ຄວນ.
ການວິໄຈດິນໃນປັດຈຸບັນເຫັນວ່າມີທ່າແຮງເພີ່ມຂຶ້ນຫຼາຍຖ້າທຽບໃສ່ເມື່ອກ່ອນ ໃນປີ2020 ວິໄຈດິນໄດ້ 1000 ກ່ວາຕົວຢ່າງ, ປີ 2021 ວິໄຈດິນໄດ້ 2000 ກ່ວາຕົວຢ່າງ ແລະ ປີ 2022 ນີ້ມີທ່າທີ່ຈະເພີ້ມຂື້ນຫຼາຍ ເນື່ອງຈາກວ່າຫຼາຍພາກສ່ວນໄດ້ຫັນມາໃຫ້ຄວາມສຳຄັນຂອງດິນ ໂດຍສະເພາະແມ່ນບັນດາຜູ້ປະກອບການ, ຊາວກະສິກອນ, ໂຄງການທັງພາກລັດ ແລະ ເອກະຊົນ.
ທ່ານສາມາດ ຕິດຕໍ່ສອບຖາມ ລາຍລະອຽດ ກ່ຽວກັບການວິໄຈດິນຂອງທ່ານ ໄດ້ທີ່ ສູນວິໄຈດິນພືດ ແລະ ຝຸ່ນ, ກົມຄຸ້ມຄອງ ແລະ ພັດທະນາດິນກະສິກໍາ ກະຊວງກະສິກໍາ ແລະ ປ່າໄມ້ ຕັ້ງຢູ່ ບ້ານ ໜອງວຽງຄຳ ເມືອງ ໄຊທານີ ນະຄອນຫຼວງວຽງຈັນ.
ສອບຖາມຂໍ້ມູນເພີ່ມຕື່ມ ທີ່ເບີ: 030 9981400
