ປະເທດລາວມີອາຫານທີ່ມີລົດຊາດແຊບເປັນເອກະລັກ ແລະ ນິຍົມຮັບປະທານຫຼາກຫຼາຍປະເພດ ໂດຍອີງຕາມລະດູການຂອງທຳມະຊາດ ເຊັ່ນ ວັດຖຸດິບຕາມລະດູການ ຂອງແຕ່ລະທ້ອງຖິ່ນ, ເຊິ່ງສ່ວນໃຫ່ຍອາຫານທີ່ນິຍົມຮັບປະທານໃນແຕ່ລະມື້ ມັກປຸງແຕ່ງຈາກວັດຖຸດິບ ພືດຜັກສະໝຸນໄພພື້ນບ້ານທີ່ຫາໄດ້ພາຍໃນທ້ອງຖິ່ນ ຫຼື ຈາກສວນຜັກຄົວເຮືອນ
ດັ່ງທີ່ຫຼາຍທ່ານຮູ້ ປະເທດລາວອຸດົມສົມບູນໄປດ້ວຍຊີວະນາໆພັນ ພືດຜັກນາໆຊະນິດ ເຊິ່ງນຳພາໄປສູ່ການປະກອບອາຫານເພື່ອລ້ຽງຊີບ ແລະ ເປັນເອກະລັກປະຈຳທ້ອງຖິ່ນຕ່າງໆໃນ ສປປ ລາວ ແລະ ຍັງເຕັມໄປດ້ວຍໂພຊະນາການທາງດ້ານອາຫານ
ທັງນີ້ ອາຫານພື້ນບ້ານປຸງແຕ່ງໄດ້ງ່າຍດາຍແຕ່ມີຄວາມພິເສດຫຼາຍ ແຕ່ລະພື້ນທີ່ມີເອກະລັກການປຸງແຕ່ງອາຫານທີ່ໂດດເດັ່ນເປັນຂອງໃຜລາວ ເຊັ່ນ: ເຂົ້າຕົ້ມ ເປັນອາຫານດັ້ງເດີມທີ່ຕິດພັນກັບຫຼາກຫຼາຍປະເພນີໃນລາວ, ນອກນັ້ນຍັງມີຫຼາກຫຼາຍລົດຊາດໃຫ້ເລືອກຮັບປະທານໄດ້ ໂດຍສະເພາະເຂົ້າຕົ້ມຖົ່ວດຳ ເຊິ່ງມີຄຸນຄ່າທາງໂພຊະນາການຫຼາຍຢ່າງດັ່ງນີ້: 327 ແຄລໍຣີ/ຖົ່ວດຳ100 ກຼາມ, ໂປຣຕີນສູງ 20.9 g/100 g, ແຄຊຽມສູງ (200 mg) ແລະ ທາດເຫຼັກ (10.9 mg) ເຊິ່ງວັດຖຸດິບປະກອບມີ: ເຂົ້າ 1 kg, ຖົ່ວດຳ 3 g, ເກືອ 1 ບ່ວງຊາ
ນອກນັ້ນ ກໍຍັງມີອາຫານອື່ນໆຊ່ວຍເພີ່ມໂພຊະນາການນຳອີກເຊັ່ນ: ສັງຂະຫຍາໝາກອຶ, ເຂົ້າໜົມມັນຕົ້ນ, ແໜມໝາກອຶ ເປັນຕົ້ນ. ປະເພດອາຫານທີ່ຄົນລາວນິຍົມປຸງແຕ່ງມີຫຼາກຫຼາຍປະເພດເຊັ່ນ: ຕົ້ມ, ແກງ, ປີ້ງ ຫຼື ເຜົາ, ໝົກ, ຂົ້ວຈືນ, ແຈ່ວ, ລາບກ້ອຍ, ເຄື່ອງດອງຕ່າງໆ ແລະ ຂອງຫວານເປັນຕົ້ນ.
ດ້ວຍເຫດຜົນເຫຼົ່ານີ້ ການສົ່ງເສີມເຕັກນິກການປູກ ອະນຸຮັກເສີມຂະຫຍາຍ ຊະນິດພືດຜັກພື້ນເມືອງ ຊີວະນາໆພັນ ເພື່ອການບໍລິໂພກເປັນອາຫານຈຶ່ງເປັນໜຶ່ງສິ່ງທີ່ສຳຄັນ ນອກຈາກຈະສາມາດປຸງແຕ່ງໄດ້ງ່າຍດ້ວຍຕົນເອງ ດີຕໍ່ສຸຂະພາບຮ່າງກາຍແລ້ວ ຍັງເປັນການອະນຸຮັກປະເພນີວັດທະນະທຳ ຢ່າງອາຫານພື້ນເມືອງ ແລະ ຍັງປະຢັດຄ່າໃຊ້ຈ່າຍ ຫາວັດຖຸດິບຕາມຮົ້ວສວນ ຫຼື ຈະປູກເອງໄວ້ກິນຍາວນານ ກໍໄດ້ ຫຼຸດຜ່ອນຄວາມກັງວົນເລື່ອງຄວາມປອດໄພອາຫານ
