ກ້ວຍໜີບ

ສ່ວນປະກອບ

• ໝາກກ້ວຍ 3 ຫວີ
• ເກືອ 2 ບ່ວງແກງ
• ນ້ຳສະອາດ ສຳລັບລ້າງ

ວິທີເຮັດກ້ວຍໜີບ

• ເອົາກ້ວຍສຸກປອກເປືອກ ແຊ່ລົງນ້ຳເກືອໃສ່ຊາມໃຫ່ຍປະໄວ້ 30 ນາທີ
• ເອົາກ້ວຍອອກໃສ່ກະດົ້ງ ແລ້ວເອົາໄປໃສ່ແຕະຕາກ, ເອົາຜ້າແພດຳປົກ ເພື່ອກັນແມງວັນ ຫຼື ໃສ່ຕູ້ຕາກ ປະມານ 1 ມື້
• ເອົາກ້ວຍທີ່ຕາກແດດແລ້ວມາແກະເອົາໄຍ ທີ່ຕິດໜ່ວຍກ້ວຍອອກ
• ຕອນເຊົ້ານຳເອົາກ້ວຍມາຜ່າທາງຍາວໜາປະມານ 1/3 ເຊັນ ຫຼື ເອົາໄມ້ໜີບໃຫ້ແປເປັນແຜ່ນ (ຕ້ອງຮອງດ້ວຍຜ້າຢາງໃສ) ຫຼັງຈາກນັ້ນນຳເອົາມາວາງໃສ່ແຕະຕາກ (ຕາກແດດອີກ) ປະມານ 1 ວັນ
• ນຳເອົາແຕະຕາກກ້ວຍເຂົ້າຕູ້ອົບໃຊ້ໄຟຟ້າແຮງປານກາງ ປະມານ 6 ຊົ່ວໂມງ ຫຼື ຕາກແດດທຳມະຊາດຈົນກວ່າຈະແຫ້ງດີ
• ເອົາກ້ວຍອອກມາຈາກຕູ້ອົບເພື່ອມາພັບໃຫ້ເປັນຫໍ່ ແລ້ວເອົາໃສ່ພາຫະນະທີ່ສະອາດ ຫຼື ຖົງໄວ້ ຖ້າແມ່ນຕາກແດດທຳມະຊາດຕ້ອງໄດ້ພັນເປັນຫໍ່ ແລ້ວເອົາໄປຕາກແດດອີກຢ່າງໜ້ອຍ 1 ມື້

stockfreeimages.com

ຄຳແນະນຳ

• ສາມາດຮັບປະທານໄດ້ເລີຍເປັນອາຫານຫວ່າງ ຫຼື ຈະຮັບປະທານກັບນ້ຳເຊື່ອມກະທິ
• ຮັບປະທານເປັນອາຫານວ່າງ ຫຼື ເຮັດເປັນສິນຄ້າສ້າງລາຍຮັບເສີມ

ຂໍ້ມູນເພີ່ມເຕີມຈາກ ປຶ້ມການແປຮູບອາຫານ

ສ່ວນປະສົມສຳລັບ ນ້ຳເຊື່ອມກະທີ

• ນໍ້າຕານປີບ  2 ຈອກກາເຟ
• ນ້ຳຕານຊາຍຂາວ ½ ຈອກກາເຟ
• ນ້ຳຕານຊາຍແດງ ½ ຈອກກາເຟ
• ຫົວກະທິ 2 ແກງ
• ໝາກພ້າວອ່ອນ ຂູດມຸ່ນ 1 ຈອກາເຟ
• ໃບເຕີຍ 1 ໃບ
• ເກືອ ½ ບ່ວງຊາ

ວິທີເຮັດນ້ຳເຊື່ອມກະທິ

• ຄ້າງໝໍ້ ໃສ່ນ້ຳຕານທັງ 3 ຊະນິດລົງໄປພ້ອມດ້ວຍເກືອ ແລະ ຫົວກະທິ (1 ບ່ວງແກງ) ກຽວດ້ວຍໄຟອ່ອນໆ ປະມານ 15-20 ນາທີ 
• ໃສ່ກະທິເພີ່ມອີກ 1 ບ່ວງແກງພ້ອມໝາກພ້າວອ່ອນ ແລະ ໃບເຕີຍ ກຽວຕໍ່ໄປ ອີກ 10 ນາທີ ແລ້ວປະໄວ້ໃຫ້ເຢັນເພື່ອນຳມາໃສ່ກ້ວຍໜີບ