ນັກຄົ້ນຄວ້າລາວໄດ້ຄົ້ນພົບປາຜັ່ນສະເພາະໃນ ສປປ ລາວ

ທ່ານຮູ້ຫລືບໍ ນັກຄົ້ນຄວ້າລາວສາມາດຄົ້ນພົບແລະຈົດຊື່ຊະນິດປາຜັ່ນທີ່ມີ ແຕ່ສະເພາະໃນລາວ

ນັບແຕ່ປີ 1999 ຈົນເຖິງປະຈຸບັນ, ສູນຄົ້ນຄວ້າການປະມົງ ຮ່ວມກັບ ຄະນະກຳມະການແມ່ນ້ຳຂອງ (MRC) ແລະ ນັກວິຊາການຈາກຫຼາຍປະເທດ ໄດ້ດຳເນີນການສຶກສາຄົ້ນຄວ້າຊະນິດພັນປາໃນອ່າງແມ່ນ້ຳຂອງ ແລະ ສາຂາຕ່າງໆ ຂອງແມ່ນ້ຳຂອງ.

ຜົນການສຶກສາພົບວ່າ ອ່າງແມ່ນ້ຳຂອງມີປາປະມານ 1,000–1,200 ຊະນິດ. ໃນນັ້ນ ມີປາຜັ່ນ (ສະກຸນ Schistura) ຫຼາຍຊະນິດທີ່ໄດ້ຮັບການຄົ້ນພົບເປັນຊະນິດໃໝ່ຂອງໂລກ.

ເປັນທີ່ໜ້າພູມໃຈວ່າ ບາງຊະນິດໄດ້ຮັບການຕັ້ງຊື່ເພື່ອເປັນກຽດແກ່ນັກຄົ້ນຄວ້າລາວ ແລະ ສະຖານທີ່ຄົ້ນພົບ ໄດ້ແກ່:

• Schistura kongphengi – ຕັ້ງຊື່ເປັນກຽດແກ່ ທ່ານ ກອງແພງ ບົວຄຳວົງສາ ນັກຄົ້ນຄວ້າລາວ. ຄົ້ນພົບຢູ່ນ້ຳເທີນ ແລະ ເຊບັ້ງໄຊ ແຂວງຄຳມ່ວນ (Kottelat, 1998).
• Schistura khamtanhi – ຕັ້ງຊື່ເປັນກຽດແກ່ ທ່ານ ຄຳຕັນ ວັດທະນາທຳ ນັກຄົ້ນຄວ້າລາວ (Kottelat, 2000).
• Schistura kaysonei – ຕັ້ງຊື່ເພື່ອເປັນກຽດແກ່ ທ່ານ ໄກສອນ ພົມວິຫານ ຜູ້ນຳແຫ່ງການປະຕິວັດລາວ (Vidthayanon & Jaruthanin, 2002).
• Schistura thavonei – ຕັ້ງຊື່ເປັນກຽດແກ່ ທ່ານ ຖາວອນ ພົມມະວົງ ນັກຄົ້ນຄວ້າລາວຈາກສູນຄົ້ນຄວ້າການປະມົງ. ມີຄວາມຍາວ 44.0 mm SL, ຄົ້ນພົບຢູ່ນ້ຳມາ ແຂວງຫຼວງນ້ຳທາ (Kottelat, 2017).
• Schistura bolavenensis –
• (Schistura ເປັນຕະກຸນຂອງປາຜັ່ນ ແລະ bolavenensis ແມ່ນຊື່ຂອງພູພຽງບໍລິເວນສະຖານທີ່ທີ່ຄົ້ນພົບ (Kottelat, 2000).

ການຄົ້ນພົບເຫຼົ່ານີ້ ສະທ້ອນໃຫ້ເຫັນເຖິງຄວາມອຸດົມສົມບູນຂອງຄວາມຫຼາກຫຼາຍທາງຊີວະນານາພັນໃນ ສປປ ລາວ ແລະ ບົດບາດສຳຄັນຂອງນັກຄົ້ນຄວ້າລາວໃນການສຶກສາ ແລະ ອະນຸລັກຊັບພະຍາກອນສັດນ້ຳຂອງປະເທດ.

ແຫຼ່ງຂໍ້ມູນ: ສູນຖ່າຍທອດຂໍ້ມູນ