ມັກແບບໃດ ຂະຫຍາຍພັນພືດແບບອາໄສເພດ ຫຼື ບໍ່ອາໄສເພດ?

ການຂະຫຍາຍພັນພືດແມ່ນວິທີການຜະລິດເພື່ອເພີ່ມປະລິມານພັນພືດໃຫ້ຫຼາຍຂຶ້ນໂດຍມີຈຸດປະສົງເພື່ອຄົງໄວ້ຂອງສາຍພັນພືດຊະນິດຕ່າງໆບໍ່ໃຫ້ສູນພັນໄປ ຫຼື ເພື່ອປູກ ແລະ ຈຳໜ່າຍຕາມທ້ອງຕະຫຼາດ. ປັດຈຸບັນວິທະຍາການຕ່າງໆມີຄວາມກ້າວໜ້າ ເຮັດໃຫ້ເຕັກນິກການຂະຫຍາຍພັນກໍມີການພັດທະນາເຊັ່ນດຽວກັນ ທີ່ສາມາດຂະຫຍາຍໃນປະລິມານທີ່ຫຼາຍໃນໄລຍະເວລາສັ້ນໆ ແລະ ສາມາດປັບປຸງສຍພັນພືດໃຫ້ເກີດສາຍພັນໃໝ່ຕາມທີ່ຕ້ອງການໄດ້ເປັນຕົ້ນແມ່ນໃຫ້ຜົນຜະລິກຫຼາຍຂຶ້ນ, ມີດອກໃຫຍ່, ແຂງແຮງ ແລະ ສວຍງາມຂຶ້ນ. ເຊິ່ງເຮົາສາມາດແຍກການຂະຫຍາຍພັນພືດອອກເປັນ 2 ຮູບແບບຄື: ການຂະຫຍາຍພັນແບບອາໄສເພດ ແລະ ການຂະຫຍາຍພັນແບບບໍ່ອາໄສເພດ.

ການຂະຫຍາຍພັນແບບອາໄສເພດ

ການຂະຫຍາຍພັນແບບອາໄສເພດ ແມ່ນການຂະຫຍາຍດ້ວຍແກ່ນ ເຊິ່ງເກີດຈາກການປະສົມພັນລະຫວ່າງເກສອນເພດຜູ້ ແລະ ເພດແມ່ ຂອງດອກ ຈົນເກີດປະຕິກິລິຍາພາຍໃນຮັງໄຂ່ແລ້ວຮັງໄຂ່ຈະກາຍເປັນໝາກ ແລະ ໄຂ່ຈະກາຍເປັນແກ່ນ, ພາຍໃນຂອງແກ່ນຈະມີໜໍ່ອ່ອນ ເມື່ອເຮົານຳໄປປູກມັນກໍຈະແຕກງອກ ແລະ ຈະເລີນເຕີບໂຕກາຍເປັນຕົ້ນໃໝ່ຂຶ້ນ ທີ່ມີລັກສະນະຄືຕົ້ນເດີມແຕ່ມີຈຳນວນຫຼາຍຂຶ້ນ. ການຂະຫຍາຍພັນຮູບແບບນີ້ມີຂໍ້ດີ ແລະ ຂໍ້ເສຍດັ່ງນີ້:

ຂໍ້ດີ

ຂໍ້ເສຍ

ເຮັດໄດ້ງ່າຍ, ໄດ້ຫຼາຍ ແລະ ສະດວກໃນການປະຕິບັດ

ສາມາດກາຍພັນໄດ້ງ່າຍ(ບໍ່ຮັກສາສາຍພັນເດີມໄວ້ໄດ້)

ມີລະບົບຮາກແກ້ງທີ່ແຂງແຮງ ແລະ ສົມບູນ

ລຳຕົ້ນສູງໃຫຍ່ມີຄວາມຫຍຸງຍາກໃນການເກັບກ່ຽວ(ສຳລັບໝາກໄມ້ໃຫ້ໝາກ)

ມີຄວາມແຂງແຮງ ທົນຕໍ່ສະພາບແວດລ້ອມ ແລະ ພະຍາດ

ໃຫ້ຜົນຜະລິດຊ້າ ແລະ ເສຍເວລາໃນການບົວລະບັດຮັກສາ(ສຳລັບໄມ້ໃຫ້ໝາກ)

ອາຍຸຍືນ ແລະ ໃຫ້ຜົນຜະລິດຫຼາຍປີ

ວັດສະດຸ ແລະ ອຸປະກອນມີ:

• ພາຖາດ ຫຼື ໜານກ້າ ( ສຳລັບກ້າແກ່ນ).

• ຊວ້ານມື ( ໃຊ້ຕັກວັດສະດຸປູກໄມ້).

• ຄຸນ້ຳ ( ສຳລັບແຊ່ເພື່ອກະຕຸ້ນກ້າແກ່ນ).

• ວັດສະດຸສຳລັບການປູກ: ຊາຍ 1 ສ່ວນ, ແກບເຜົາ ½ ສ່ວນ, ກາບໝາກພ້າວສັບລະອຽດ ½ ສ່ວນ ( ສຳລັບກ້າໃສ່ພາຖາດ).

ຂັ້ນຕອນການປະຕິບັດ

1. ຄັດເລືອກແກ່ນພັນ: ຄວນເລືອກເອົາແກ່ນທີ່ແກ່, ມີສີເຂັ້ມ ຫຼື ສີດຳ ທີ່ຕື່ງເຕັມທີ່.

2. ການກະຕຸ້ນແກ່ນມີຫຼາຍວິທີໂດຍຂຶ້ນກັບລັກສະນະຂອງແກ່ນເຊັ່ນວ່າ: ແກ່ນທີມີຂະໜາດນ້ອຍແມ່ນໃຊ້ເວລາແຊ່ປະມານ 6-12 ຊົ່ວໂມງ ອາດຈະແຊ່ 24 ຊົ່ວໂມງ (ສຳລັບແກ່ນພືດຜັກ ຫຼື ໄມ້ໃຫ້ໝາກບາງຊະນິດ) ສ່ວນແກ່ນທີ່ມີປີກ ຫຼື ເປືອກແຂງແມ່ນຈະໃຊ້ວິທີຕັດເປືອກອອກໜ້ອຍໜຶ່ງ ຫຼື ໃຊ້ກະດາດຊາຍມາຖູກ່ອນແລ້ວຈຶ່ງນຳໄປແຊ່ໃນອ່າງນ້ຳທີ່ສະອາດ ເພື່ອໃຫ້ນ້ຳສາມາດດູດຊຶມເຂົ້າໄປໃນໄດ້ດີ(ສຳລັບໄມ້ຢືນຕົ້ນ).

3. ການກ້າມີຢູ່ 2 ແບບຄື: ການກ້າໃສ່ພາຖາດແມ່ນຈະໃຊ້ວັດສະດຸການປູກລົງພາຖາດກ່ອນຈາກນັ້ນຈຶ່ງຫວ່ານແກ່ນລົງພາຖາດໂດຍກົງຈາກນັນຈຶ່ງນຳວັດສະດຸການປູກມາປົກໜ້າເລັກນ້ອຍ ຫຼື ຈະໃຊ້ວິທີຢອດແກ່ນໂດຍການໃຊ້ໄມ້ຂີດໃຫ້ເປັນຮ່ອງ ຫຼື ເປັນຂຸມ ເຊິ່ງໄລຍະຫ່າງຕ້ອງໃຫ້ເໝາະສົມກັບແກ່ນຈາກນັ້ນຈຶ່ງຢອດແກ່ນ ແລະ ໃຊ້ວັດສະດຸປູກປົກໜ້າເລັກນ້ອຍແລ້ວຫົດນ້ຳໃຫ້ຊຸ່ມຈຶ່ງນຳໄປໄວ້ສວນກ້າ ຫຼື ບ່ອນທີ່ປອດຈາກສັດຕູພືດ ( ສຳລັບແກ່ນຂະໜາດນ້ອຍ).

ສຳລັບການກ້າແກ່ນໃສ່ໜານແມ່ນຕ້ອງໄດ້ກະກຽມໜານກ່ອນໂດຍການໄຖພວນດິນແລ້ວເຮັດເປັນໜານຈາກນັ້ນຈຶ່ງຫວ່ານແກ່ນກ້າໃສ່ຫນານ ຫຼື ຢອດແກ່ນລົງ (ໄລຍະຫ່າງຂຶ້ນກັບຂະຫນາດຂອງແກ່ນ) ແລ້ວຫົດນໍ້າໃຫ້ຊຸ່ມ (ຄວນມີຕົວບັງແສງໃນໄລຍະທໍາອິດ). ໃນແຕ່ລະມື້ຄວນກວດກາຄວາມເປັນລະບຽບຮຽບຮ້ອຍແລ້ວຫົດນໍ້າທຸກໆມື້ ເມື່ອແກ່ນແຕກງອກ ແລະ ຈະເລີນເຕີບໂຕກາຍເປັນເບ້ຍໄມ້ທີ່ແຂງແຮງສາມາດນໍາໄປຍ້າຍບົງ ຫຼື ນຳໄປປູກໃນພື້ນທີ່ຕົວຈິງໄດ້.

ການຂະຫຍາຍພັນພືດແບບບໍ່ອາໄສເພດ

ການຂະຫຍາຍພັນແບບບໍ່ອາໄສເພດແມ່ນ ການຂະຫຍາຍພັນ ໂດຍໃຊ້ພາກສ່ວນຕ່າງໆຂອງພືດ ເຊິ່ງມີຫຼາຍວິທີເຊັ່ນ: ປັກຊໍາ, ໂທມງ່າ, ແຍກເຫງົ້າ, ທາບງ່າ, ສຽບຍອດ, ຕິດຕາ ແລະ ອື່ນໆ. ເຊິ່ງວິທີເຫຼົ່ານີ້ຈະຊ່ວຍຮັກສາລັກສະນະທີ່ດີຂອງພືດໄວ້.

ຂໍ້ດີ

ຂໍ້ເສຍ

ເຮັດໄດ້ງ່າຍ ແລະ ໃຫ້ຜົນຜະລິດໄວ.

ບໍ່ມີລະບົບຮາກແກ້ວ (ຍົກເວັ້ນວິທີການທາບງາ, ສຽບຍອດ ແລະ ຕິດຕາ).

ໄດ້ເບ້ຍໄມ້ຂະຫນາດໃຫຍ່ ແລະ ຕົ້ນຕ່ຳ.

ບໍ່ສາມາດທົນຕໍ່ລົມພາຍຸ ແລະ ຫັກໄດ້ງາຍ.

ມີລັກສະນະຄືກັບຕົ້ນແມ່ພັນ.

ມີອາຍຸສັ້ນ ແລະ ໃຫ້ຜົນຜະລິດຫນ້ອຍປີລົງ.

ການປັກຊໍາ

ການປັກຊຳແມ່ນການນໍາເອົາພາກສ່ວນຕ່າງໆຂອງພືດທີ່ສາມາດຂະຫຍາຍພັນໄດ້ເຊັ່ນ: ລໍາຕົ້ນ ຫຼື ຍອດ, ໃບ, ຮາກ. ນໍາມາຕັດ ແລະ ປັກຊໍາໄວ້ໃນວັດສະດຸປູກທີ່ກຽມໄວ້. ເພື່ອໃຫ້ໄດ້ຕົ້ນພືດໃຫມ່ຈາກພາກສ່ວນພືດທີນໍາມາປັກຊໍາ ໂດຍມີຂັ້ນຕອນປະຕິບັດຕົວຈິງດັ່ງລຸ່ມນີ້:

ວັດສະດຸ ແລະ ອຸປະກອນ

• ກິ່ງພັນດີ

• ມີດຕັດກິ່ງພັນ

• ຖົງຢາງໃສກິ່ງພັນ ແລະ ປົກຄຸມພາຖາດ

• ພາສະນະຕ່າງໆ ຫຼື ກະໂຖ

• ວັດສະດຸປູກ (ດິນປູກ 1 ສວນ, ຊາຍ 2 ສວນ, ແກບ 1 ສ່ວນ)

• ນ້ໍາຢາເລັ່ງຮາກ

• ໄມ້ຈີ້ມຂຸມທີ່ຈະປູກ

ຂັ້ນຕອນການປັກຊໍາ

1. ຄັດເລືອກກິ່ງພັນຈາກຕົ້ນແມ່ພັນດີ ແລະ ມີອາຍຸຢ່າງຫນ້ອຍປະມານ 6-12 ເດືອນ ຂຶ້ນໄປ ທີ່ມີຍອດ, ແຂງແຮງສົມບູນບໍ່ມີພະຍາດ ແລະ ແມງໄມ້, ກິ່ງພັນຕ້ອງບໍ່ອ່ອນ ຫຼື ບໍ່ແກ່ເກີນໄປ ແລະ ເປັນງ່າທີ່ໄດ້ຮັບແສງສະຫວ່າງຢ່າງພຽງພໍ.

2. ໃຊ້ຄັດເຕີຕັດເອົາສ່ວນປາຍຍອດ ຫຼື ລຳຕົ້ນປະມານ 10-20 ຊັງຕີແມັດ, ເຊິ່ງມີ 3-4 ຕາ, ການຕັດຄວນໃຫ້ມີປາຍເຈີ້ຍເປັນມູມ 45 ອົງສາ, ສ່ວນໃບໃຫ້ເຫຼືອພຽງ 1-2 ໃບເພື່ອຫຼຸດຜ່ອນການຄາຍນໍ້າຂອງພືດ.

3. ນໍາກິ່ງພັນດີທີ່ຕັດມາຈຸ່ມ ຫຼື ແຊ່ ນ້ໍາຢາເລັ່ງຮາກປະມານ 15 ນາທີ. ແຕ່ຖ້າບໍ່ມີນ້ໍາຢາເລັ່ງຮາກກໍ່ສາມາດປັກຊໍາໄດ້ຜົນຄືກັນ (ບາງຊະນິດກໍ່ບໍ່ໄດ້ຜົນ).

4. ນາໍາກິ່ງພັນດີທີ່ແຊ່ນ້ໍາຢາເລັ່ງຮາກແລ້ວມາປັກຊາໍໃນເບົ້າ, ກະບະ ຫຼື ໃນຫນານ ໃຫ້ເລິກປະມານ 5-6 ຊັງຕີແມັດ. (ເວລາປັກຊໍາທີ່ດີຄວນເຮັດໃນຕອນເຊົ້າ ຫຼື ຕອນແລງ).

ການຕອນ ຫຼື ໂທມງ່າ

ການໂທມງ່າແມ່ນວິທີການເຮັດໃຫ້ກິ່ງ ຫຼື ລໍາຕົ້ນພືດ (ຕົ້ນແມ່ພັນດີ) ເກີດມີຮາກໃໝ່ຂຶ້ນ. ໃຫ້ກິ່ງພັນທີ່ໄດ້ມີລັກສະນະສາຍພັນຄ້າຍຄືຕົ້ນແມ່ພັນເດີມທຸກປະການ ໂດຍມີຂັ້ນຕອນປະຕິບັດຕົວຈິງດັ່ງລຸ່ມນີ້:

ວັດສະດຸ ແລະ ອຸປະກອນ

• ກິ່ງພັນດີ

• ມີດຕັດກິ່ງພັນ

• ມີດໂທມງ່າ

• ຖົງຢາງຂະຫນາດ 4×6 ນິ້ວ

• ເຊືອກຟາງ

• ກາບໝາກພ້າວສັບລະອຽດ

ຂັ້ນຕອນການປະຕິບັດ

1. ກຽມວັດສະດຸເຊັ່ນນໍາເອົາກາບພ້າວທີ່ບົດມາຕົ້ມປະມານ 4-6 ຊົ່ວໂມງ ຫຼັງຈາກນັ້ນກໍ່ນໍາມາໃສ່ຖົງຢາງພລາສຕິກຂະຫນາດ 4×6 ນິ້ວ ແລ້ວມັດເປັນຖົງປະໄວ້.

2. ຄັດເລືອກງ່າທີ່ບໍ່ນ້ອຍ ຫຼື ໃຫຍ່ເກີນໄປເຊິ່ງມີອາຍຸປະມານ 6-12 ເດືອນ ຫຼື ເຮົາສາມາດສັງເກດເບິ່ງງ່າທີ່ມີສີຂາວອົມເທົາ, ເປັນງ່າທີ່ໄດ້ຮັບແສງສະຫວ່າງ ແລະ ມີມູມ 45 ອົງສາ.

3. ປາດງ່າຢູ່ບໍລິເວນກ້ອງຂໍ້ (node) ຫຼື ກ້ອງຂໍ້ລົງມາປະມານ ½ -1 ຊັງຕີແມັດ ໂດຍປາດ 2 ຮອຍຫ່າງກັນ 2,5 ຊັງຕີແມັດ ຫຼື ເທົ່າກັບເສັ້ນວົງຮອບຂອງງ່າທີ່ຈະຕອນແລ້ວລອກເປືອກອອກ ລະວັງຢ່າປາດເລິກກາຍເນື້ອເຍື່ອ ເພາະເຈະຮັດໃຫ້ງ່າຕາຍໄດ້.

4. ຂູດເນື້ອເຍື່ອ (cambium) ອອກໃຫ້ຫມົດ  ເວລາຂຸດໃຫ້ຂູດຈາກເທິງລົງມາທາງລຸ່ມຢ່າຂູດສະຫຼັບກັນ.

5. ຖ້າເປັນໄມ້ມີຢາງຫຼັງຂູດເນື້ອເຍື່ອອອກແລ້ວຄວນປະໄວ້ 3-7 ວັນ ເພື່ອໃຫ້ນໍ້າຢາງແຫ້ງ.

6. ຖ້າມີນໍ້າຢາຮໍໂມນເລັ່ງຮາກ ຄວນໃຊ້ຮໍໂມນທາຮອຍປາດເບື້ອງເທິງ.

7. ນໍາເອົາຖົງກາບພ້າວທີ່ກຽມໄວ້ມາປາດແລ້ວ ບີບນໍ້າອອກມັດກຸ້ມປາກບາດຫຼັງຈາກນັ້ນມັດດ້ວຍເຊືອກສອງສົ້ນໃຫ້ ແຫນ້ນພໍສົມຄວນ.

8. ຫຼັງຈາກ 2 ອາທິດແລ້ວກວດເບິ່ງ ແລະ ເມື່ອໄດ້ປະມານຫນຶ່ງ ຫຼື ສອງເດືອນກໍ່ຈະເຫັນຮາກສີຂາວອອກມາຢູ່ຕາມຖົງ ກາບພ້າວ.

ການແຍກເຫງົ້າ

ການແຍກເຫງົ້າແມ່ນການ ແບ່ງເຫງົ້າຂອງຕົ້ນແມ່ພັນເດີມອອກເປັນ 2 ຕົ້ນຂຶ້ນໄປ ເຊິ່ງເປັນການເຮັດໃຫ້ພືດມີຈໍານວນເພີ່ມຂຶ້ນແບບທະວີຄູນ ແຕ່ລັກສະນະສາຍພັນຍັງຄ້າຍຄືຕົ້ນແມ່ນພັນເດີມ, ໂດຍມີຂັ້ນຕອນປະຕິບັດຕົວຈິງດັ່ງລຸ່ມນີ້.

ວັດສະດຸ ແລະ ອຸປະກອນ

• ຕົ້ນແມ່ພັນດີ

• ຄັດເຕີ ຫຼື ມີດຕັດ ສຽມ ຫຼື ຊວ້ານ

• ຖົງຢາງຂະຫນາດ 4×7 ຫຼື 6×12 0

• ດິນປູກ (ດິນປູກ 1 ສ່ວນ, ຊາຍ 2 ສ່ວນ, ແກບ 1 ສ່ວນ)

ຂັ້ນຕອນການປະຕິບັດ

1. ກຽມເບົ້າ ຫຼື ກະບະທີ່ມີພືດຕ້ອງການແຍກ

2. ເລືອກຕົ້ນແມ່ພັນທີ່ດີຕ້ອງເປັນສຸມທີ່ໃຫຍ່, ແຫນ້ນ ແລະ ມີລັກສະນະແຂງແຮງທົນທານຕໍ່ກັບເຊື້ອພະຍາດ,

3. ໃຊ້ຊວ້ານມື ຫຼື ຄັດເຕີຕັດແຍກພືດອອກເປັນສຸມໂດຍໃຫ້ຫນຶ່ງສຸມມີຫນຶ່ງ) ຫຼື ສອງຂຶ້ນໄປ.

4. ນໍາມາປູກໃສ່ໂຖ ຫຼື ຖົງຢາງໂດຍໃຫ້ວັດສະດຸປູກຖົມເຫງົ້າພຽງເລັກນ້ອຍ.

5. ຈາກນັ້ນເອົາມາພັກໄວ້ໃນຕູ້ອົບ ຫຼື ເຮືອນຮົ່ມປະມານ 2-3 ເດືອນ ຈຶ່ງສາມາດນໍາໄປປູກໄດ້.

ການທາບງ່າ

ການທາບງ່າແມ່ນການນາໍເອົາພືດ 2 ຕົ້ນມາເປັນຕົ້ນດຽວກັນ ໂດຍພາກສ່ວນຕົ້ນຕໍທີ່ນາໍມາທາບງ່າຈະເຮັດຫນ້າທີ່ເປັນ ລະບົບຮາກເພື່ອຫາອາຫານໃຫ້ກິ່ງພັນດີ, ໂດຍມີຂັ້ນຕອນປະຕິບັດຕົວຈິງດັ່ງລຸມນີ້:

ວັດສະດຸ ແລະ ອຸປະກອນ

• ກິ່ງພັນດີ

• ຕົ້ນຕໍ

• ມີດຕັດກິ່ງພັນ

• ເຊືອກຟາງ

• ກາບຫມາກພ້າວສັບລະອຽດ

• ເຊືອກພັນກິ່ງ

ຂັ້ນຕອນການປະຕິບັດ

1. ການກະກຽມຕົ້ນຕໍ: ຕ້ອງມີອາຍຸປະມານ 8-12 ເດືອນ ມີລະບົບຮາກທີ່ແຂງແຮງສົມບູນ ແລະ ເປັນຊະນິດດຽວ ກັບກິ່ງພັນດີຫຼັງຈາກນັ້ນນໍາຕົ້ນຕໍທີ່ຂຸດອອກຈາກຫນານມາຕັດຮາກແກ້ວອອກໃຫ້ສັ້ນ ຫຼື ຍາວປະມານ 10 ຊັງຕີແມັດ, ຕັດຮາກຝອຍອອກແລ້ວນໍາໄປໃສ່ຖົງຢາງ. ຈາກນັ້ນ ນໍາກາບຫມາກພ້າວມາໃສ່ຖົງຢາງຈົນເຕັມ ແລະ ນໍາເອົາຕົ້ນຕໍລົງໄປແລ້ວໃຊ້ເຊືອກຟາງມັດໄວ້.

2. ການເລືອກກິ່ງພັນທີ່ດີ ຄວນເລືອກເອົາຈາກຕົ້ນແມ່ພັນດີທີ່ແຂງແຮງ, ໄດ້ຮັບຫມາກຜົນຫຼາຍ (ໄມ້ໃຫ້ຫມາກ) ເປໄດ້ຮັບແສງສະຫວ່າງພຽງພໍ, ມີມູມອ່ຽງ 45 ອົງສາ, ກິ່ງບໍ່ອ່ອນ ແລະ ບໍ່ແກ່ເກີນໄປ.

3. ໃຊ້ມີດປາດໄປຕາມລວງຍາວຂອງກິ່ງງ່າຂອງຕົ້ນໄມ້ຍາວປະມານ 5-6 ຊັງຕີແມັດ.

4. ຕົ້ນຕໍຍາວປະມານ 15-18 ຊັງຕີແມັດ, ນໍາຕົ້ນຕໍມາປາດຍາວສະຫຼຽງຂ້າງຫນຶ່ງ ແລະ ປາດລັດທີ່ປາຍອີກດ້ານຫນຶ່ງ 5. ໃຊ້ເທບຄຽນອ້ອມຮອບບໍລິເວນປາກບາດໃຫ້ແຫນ້ນ.

5. ໃຊ້ມີດປາດລັດກ້ວາງປະມານ 1 ຊັງຕີແມັດ ແລ້ວລອກເອົາເປືອກອອກເພື່ອເປັນການຕັດທໍ່ລໍາລຽງອາຫານ.

6. ຫຼັງຈາກນັ້ນປະໄວ້ປະມານ 45 ວັນ ກໍ່ຈະເຫັນຮາກຂອງຕົ້ນຕໍນັ້ນອອກມາຈົນກວ່າຈະມີຮາກຫຼາຍ ແລ້ວຈິ່ງຕັດເອົາຕົ້ນໄມ້ດັ່ງກ່າວນັ້ນມາຊາໍໄດ້.

ການຕິດຕາ

ການຕິດຕາແມ່ນການເຊື່ອມຕິດຂອງລາໍຕົ້ນ ແລະ ຕາພັນທີ່ດີເຂົ້າດ້ວຍກັນ ເພື່ອໃຫ້ຈະເລີນເຕີບໂຕເປັນຕົ້ນດຽວກັນ ໂດຍການນາໍແຜ່ນຕາຈາກຕົ້ນພັນດີໄປຕິດກັບຕົ້ນຕໍ, ການຕິດຕາມີຫຼາຍແບບເຊັ່ນ: ການຕິດຕາແບບຕົວເຕ (T), ຕິດຕາແບບປ່ອງຢ້ຽມ, ຕິດຕາແບບ 4 ລ່ຽມຍາວ ແລະ ແບບໃຊ້ກັບຕົ້ນພືດທີ່ລອກເປືອກຍາກ ເຊິ່ງໃນນີ້ຈະນໍາສະ ເຫນີພຽງວິທີດຽວຄື: ການຕິດຕາ ແບບຕົວເຕT ດັ່ງນີ້:

1. ການເລືອກຕົ້ນຕໍ ແມ່ນຄ້າຍຄືກັບການເລືອກຕົ້ນຕໍຂອງວິທີການສຽບຍອດ.

2. ການເລືອກຕາຈາກຕົ້ນພັນດີແມ່ນເລືອກຈາກຕົ້ນທີ່ແຂງແຮງ ແລະ ສົມບູນ

3. ປາດຕົ້ນຕໍເປັນຮູບຕົວເຕ T ຍາວປະມານ 3-5 ຊັງຕີແມັດ ແລ້ວຈຶ່ງເປີດເປືອກອອກພຽງເລັກນ້ອຍ.

4. ປາດແຜ່ນຕາເປັນຮູບໂລ່ແລ້ວແກະເນື້ອໄມ້ອອກ.

5. ສອດແຜ່ນຕາເຂົ້າໄປໃຫ້ແຫນ້ນແລ້ວຕັດສ່ວນທີ່ເຫຼືອອອກໃຫ້ພໍດີກັບບ່ອນປາດ.

6. ຫຼັງຈາກນັ້ນພັນດ້ວຍແຜ່ນຢາງໃຫ້ແຫນ້ນປະໄວ້ປະມານ 7-10 ວັນ ຈະເຫັນຕາສີຂາວລຸ່ມຂຶ້ນຫຼັງຈາກນັ້ນເຮົາກໍ່ມາຍ ເອົາຢາງ ທີ່ພັນນັ້ນອອກແລ້ວກໍ່ພັນຄືນ ໂດຍຈົ່ງຕາທີ່ຈະປົ່ງຂຶ້ນນັ້ນໄວ້.

7. ເມື່ອຕາແຕກອອກມາແລ້ວກໍ່ເລີ່ມຕັດຍອດຕົ້ນຕໍ່ຖິ້ມໂດຍໃຫ້ຫ່າງຈາກຕາປະມານ 2-3 ຊັງຕີແມັດ.

ການສຽບຍອດ

ການສຽບຍອດແມ່ນການເຊື່ອມຕິດເນື້ອເຍື່ອຂອງຕົ້ນພືດ 2 ຕົ້ນເຂົ້າຫາກັນ ເພື່ອໃຫ້ຈະເລີນເຕີບໂຕເປັນຕົ້ນດຽວກັນ, ເຊິ່ງປະກອບມີຫຼາຍແບບຄື: ແບບເຂົ້າກີ້ມ, ແບບສຽບຂ້າງ ແລະ ແບບປະກົບກັນ. ເຊິ່ງເຮົາໄດຍົກຕົວຢ່າງ 2 ແບບຄື: ການສຽບຍອດ ແລະ ການສຽບຂາງ.

ການສຽບຍອດແບບສຽບຂ້າງ:

1. ຄວນເລືອກຕົ້ນທີ່ສົມບູນທີ່ປູກໃນກະຖັງ, ຫມໍ້, ຖົງພລາສຕິກ ຫຼື ໃນຫນານກ້າ.
2. ເລືອກງ່າພັນທີ່ບໍ່ສູງປານໃດເພື່ອສະດວກໃນການປະຕິບັດງານ, ງ່າພັນທີ່ເຫມາະສົມກັບຕົ້ນຕໍຄວນມີຂະຫນາດໃຫຍ່ໃກ້ຄຽງກັນ.
3. ປາດງາພັນດີໃຫ້ເຂົ້າເນື້ອໄມ້ໃຫ້ເລິກບໍ່ເກີນ 1/2 ຂອງງ່ານັ້ນ, ມີຄວາມຍາວເທົ່າກັບຮອຍປາກບາດຂອງຕົ້ນຕໍເຊິ່ງ ຮອຍປາດໃຫ້ມີຂະຫນາດຢູ່ໃນລະຫວ່າງ 3-5 ຊັງຕີແມັດ.
4. ຕັດຍອດຕົ້ນຕໍທາງດຽວກັນກັບບາດແຜຂອງງ່າປາດເປັນຮູບປາກສະຫຼາມຍາວເທົ່າກັບບາດແຜຂອງງ່າພັນດີ.
5. ສອດປາຍຕົ້ນຕໍເຂົ້າໄປໃນປາກບາດງ່າພັນດີເຊິ່ງໃຫ້ທາງໃນເນື້ອເຍື່ອຈະເລີນກົງກັນ.
6. ແລ້ວພັນດ້ວຍພລາສຕິກໃຫ້ແຫນ້ນ, ໃຊ້ເວລາປະມານ 2-3 ອາທິດແລ້ວເນື້ອເຍື່ອທັງສອງງ່າຈະປະສານກັນ.

ຂໍ້ມູນຈາກ:ຄູ່ມືພືດສວນ