ບຸນປະສັກໄຊ ຄຳພູມີ (ກົບ)

Last updated on July 16, 2026
(first published: July 15, 2026)
by Bouavone Thipphavanh

ຮ່ວມສ້າງຄວາມເຂັ້ມແຂງໃນການອະນຸລັກປ່າໄມ້ ຜ່ານການຄົ້ນຄວ້າ ແລະ ການຮ່ວມມື

ນະຄອນຫຼວງວຽງຈັນ

ລັດຖະບານ

ນະໂຍບາຍ ແລະ ການສົ່ງເສີມ

ການຈັດການກ່ຽວກັບກະສິກຳປ່າໄມ້ ແລະ ລະບົບນິເວດ

ບຸນປະສັກໄຊ ຄຳພູມີ ເປັນນັກຄົ້ນຄວ້າດ້ານປ່າໄມ້ຂອງລາວ ແລະ ຜູ້ຊ່ຽວຊານດ້ານວິທະຍາການປ່າໄມ້ ທີ່ມີປະສົບການຫຼາຍກວ່າ 20 ປີ ໃນດ້ານການຈັດການປ່າໄມ້ຢ່າງຍືນຍົງ, ການຟື້ນຟູປ່າ ແລະ ການອະນຸລັກຄວາມຫຼາກຫຼາຍທາງຊີວະນາໆພັນ. ຜ່ານມາ ລາວເຄີຍເຮັດວຽກຢູ່ສູນຄົ້ນຄວ້າປ່າໄມ້ ຂອງສະຖາບັນຄົ້ນຄວ້າກະສິກຳ ແລະ ປ່າໄມ້ແຫ່ງຊາດ (NAFRI) ແລະ ປັດຈຸບັນດຳລົງຕຳແໜ່ງເປັນວິຊາການຢູ່ພະແນກຄຸ້ມຄອງປ່າສະຫງວນ ຂອງກົມປ່າໄມ້, ສປປ ລາວ. ຕະຫຼອດໄລຍະການເຮັດວຽກ, ລາວໄດ້ມີສ່ວນສຳຄັນໃນການຄົ້ນຄວ້າດ້ານປ່າໄມ້, ການພັດທະນານະໂຍບາຍ ແລະ ການນຳໃຊ້ວິທີການທີ່ເໝາະສົມໃນການອະນຸລັກຊັບພະຍາກອນປ່າໄມ້ຂອງປະເທດ.

ໜຶ່ງໃນວຽກງານຫຼັກຂອງລາວ ແມ່ນການປັບປຸງການຈັດຫາແຫຼ່ງແນວພັນທີ່ມີຄຸນນະພາບສຳລັບການຟື້ນຟູປ່າ. ມີສ່ວນຮ່ວມໃນການສຳຫຼວດ ແລະ ກຳນົດພື້ນທີ່ແຫຼ່ງແນວພັນໄມ້ 76 ແຫ່ງ ສຳລັບຕົ້ນໄມ້ຊະນິດພື້ນເມືອງ 29 ຊະນິດ ຄອບຄຸມທັງ 18 ແຂວງຂອງ ສປປ ລາວ. ຜົນງານດັ່ງກ່າວໄດ້ຊ່ວຍເສີມສ້າງ ສວນກ້າໄມ້ ແລະ ສະໜັບສະໜູນວຽກງານຟື້ນຟູປ່າໃນລະດັບຊາດ. ທັງນັ້ນ ບຸນປະສັກໄຊ ໄດ້ສຳເລັດການສຶກສາລະດັບປະລິນຍາໂທ ສາຂາວິຊາວິທະຍາການປ່າໄມ້ (ການຈັດການປ່າໄມ້ເຂດຮ້ອນ) ຈາກມະຫາວິທະຍາໄລ Nanjing Forestry University ປະເທດຈີນ ເຊິ່ງການຄົ້ນຄວ້າຂອງລາວໄດ້ປະກອບສ່ວນໃນການເພີ່ມພູນຄວາມຮູ້ກ່ຽວກັບການປູກໄມ້ພື້ນເມືອງ, ການຟື້ນຟູປ່າ ແລະ ການອະນຸລັກຄວາມຫຼາກຫຼາຍທາງຊີວະນາໆພັນ.

ບຸນປະສັກໄຊ ໄດ້ເຜີຍແຜ່ຜົນງານຄົ້ນຄວ້າທາງວິຊາການຫຼາຍດ້ານ ເຊັ່ນ: ນິເວດວິທະຍາປ່າໄມ້, ຊະນິດພັນໄມ້ພື້ນເມືອງ, ລະບົບປ່າໄມ້ກະສິກຳ ແລະ ການຈັດການປ່າໄມ້ຢ່າງຍືນຍົງ. ທັງຍັງເປັນຕົວແທນຂອງ ສປປ ລາວ ໃນຫຼາຍກິດຈະກຳດ້ານປ່າໄມ້ລະດັບພາກພື້ນ ເຊັ່ນ: Asia-Pacific Network for Sustainable Forest Management and Rehabilitation (APFNet) ແລະ Sino-ASEAN Network of Forestry Research Institutes (SANFRI). ນອກຈາກນີ້ ລາວຍັງມີສ່ວນຮ່ວມໃນຖານຂໍ້ມູນຊະນິດພັນຂອງພັນພືດ ພາຍໃຕ້ໂຄງການ ພາເຂົ້າລາວ ແລະ ເປັນສະມາຊິກຂອງຄະນະເຮັດວຽກອາຊຽນດ້ານການອະນຸລັກທຳມະຊາດ ແລະ ຄວາມຫຼາກຫຼາຍທາງຊີວະນາໆພັນ (AWGNCB).

ຜ່ານການຄົ້ນຄວ້າ, ການຮ່ວມມື ແລະ ການເຊື່ອມສານກັບພາກພື້ນ, ລາວຍັງຄົງສືບຕໍ່ສະໜັບສະໜູນການຈັດການປ່າໄມ້ ແລະ ຊັບພະຍາກອນທຳມະຊາດຂອງລາວຢ່າງຍືນຍົງ ເພື່ອປະໂຫຍດແກ່ຄົນຮຸ່ນຕໍ່ໄປ.

ສຳລັບ ບຸນປະສັກໄຊ, ວຽກງານດ້ານປ່າໄມ້ບໍ່ແມ່ນພຽງແຕ່ເປັນອາຊີບ ແຕ່ເປັນໂອກາດທີ່ຈະຮ່ວມປົກປ້ອງປ່າໄມ້ອັນມີຄຸນຄ່າ ແລະ ຄວາມຫຼາກຫຼາຍທາງຊີວະນາໆພັນອັນເປັນເອກະລັກຂອງລາວ ພ້ອມທັງສ້າງແຮງບັນດານໃຈໃຫ້ຄົນອື່ນເຫັນຄຸນຄ່າ ແລະ ຮ່ວມກັນອະນຸລັກມໍລະດົກທາງທຳມະຊາດຂອງປະເທດ.