ບຸນເຂົ້າຈີ່ແມ່ນປະເພນີໃນເດືອນສາມ ທີ່ຊາວບ້ານຮ່ວມແຮງກັນເຮັດເຂົ້າຈີ່ ແລະ ນຳໄປຖວາຍພຣະສົງ ພ້ອມທັງຮ່ວມເຮັດບຸນ ຟັງເທດ ແລະ ສືບສານປະເພນີຮ່ວມກັນ
ວິທີເຮັດເຂົ້າຈີ່
- ກຽມ ເຂົ້າໜຽວສຸກ ໃຫ້ພ້ອມ ແລະ ປັ້ນເປັນກ້ອນຕາມຂະໜາດທີ່ຕ້ອງການ.
- ໂຮຍ ເກືອ ໃສ່ເຂົ້າໜຽວເລັກໜ້ອຍ ແລ້ວປັ້ນໃຫ້ເປັນຮູບຮ່າງພໍດີ.
- ກຽມ ໄມ້ສຽບເຂົ້າຈີ່ ແລ້ວນຳກ້ອນເຂົ້າໜຽວສຽບໃສ່ໄມ້.
- ກໍ່ໄຟ ແລະ ລໍຖ້າໃຫ້ໄຟອ່ອນລົງ ຈົນເຫຼືອເປັນ ຖ່ານຮ້ອນ.
- ນຳເຂົ້າໜຽວທີ່ສຽບໄມ້ໄວ້ໄປ ຂາງໄຟ ແລະ ຄ່ອຍໆໝູນໄມ້ໃຫ້ເຂົ້າສຸກທົ່ວກັນ.
- ເມື່ອເຂົ້າໃກ້ຈະສຸກ ໃຫ້ ທາໄຂ່ໄກ່ ໃຫ້ທົ່ວຜິວເຂົ້າຈີ່.
- ນຳໄປຂາງໄຟຕໍ່ ແລະ ໝູນໄປມາ ຈົນໄຂ່ສຸກ ແລະ ມີສີເຫຼືອງງາມ.
- ເມື່ອສຸກດີແລ້ວ ຍົກອອກຈາກໄຟ ແລະ ພ້ອມຖວາຍພຣະສົງ ຫຼື ນຳໄປກິນ.
ໝາຍເຫດ: ບາງທ້ອງຖິ່ນຈະເອົານໍ້າອ້ອຍໃສ່ດ້ານໃນຂອງເຂົ້າຈີ່ ເພື່ອເພີ່ມລົດຊາດຫວານ.
